Ońtústik Koreıada koronavırýs juqtyrǵan taǵy úsh oqıǵa tirkeldi
SEÝL. QazAqpart – Jeksenbi kúni ońtústik Koreıada koronavırýstyń jańa túrin juqtyrǵan taǵy úsh oqıǵa tirkeldi, dep habarlaıdy QazAqparat Renhap-qa silteme jasap.
Osylaısha koronavırýstyń jańa túrin juqtyrǵandar 15-ke jetti. Aıta ketý kerek, 87 adam muqııat tekserip shyǵý úshin karantınde jatyr.
Aýrýlardy baqylaý jáne aldyn alý jónindegi koreı ortalyǵy 28 jastaǵy 13-shi naýqasty juma kúni Qytaıdyń Ýhan qalasynan jetkizilgen 368 adamnyń biri ekenin habarlady.
Alǵash kelgende er adamnan jańa koronavırýstyń eshqandaı belgisi bolmaǵan jáne ony Seýlden ońtústik-batysqa qaraı 90 shaqyrym jerde Asandaǵy memlekettik mekemege ornalastyrǵan. Kelesi kúni ol ózin jaısyz sezingen. Synama odan koronavırýstyń bar ekenin kórsetken. Densaýlyq saqtaý agenttiginiń habarlaýynsha, er adam dereý el astanasyndaǵy aýrýhanaǵa jetkizilip, karantınge jatqyzyldy.
«Ýhannan kelgen adamdardyń birinshi leginen bir adamnan basqasynda vırýs tabylmady. Senbi kúni elge ushyp kelgen 333 koreıdiń jeteýi muqııat tekserýden ótti. Olardyń aǵzalarynan vırýs tabylǵan joq. Degenmen, qalǵan 326 adamdy tekserý jalǵasýda», - dep habarlady ortalyqtan.
Koronavırýstyń jańa túrin juqtyrǵan 14-shi adam – vırýs juqtyrǵan er adamnyń 40 jastaǵy áıeli. Onyń aǵzasyndaǵy vırýs ótken senbi kúni tabyldy.
Ortalyqtyń habarlaýynsha, on ekinshi naýqas – Japonııada gıd bolyp jumys istegen qytaılyq. Ol baılanysty bolǵan kúnshyǵys eliniń azamattaryna vırýs dıagnozy qoıylǵan. 19 qańtarda gıd Ońtústik Koreıaǵa kelgen, biraq kelgennen keıin koronavırýs belgisi baıqalmaǵandyqtan, ol emin-erkin júrgen.
Koreılik ortalyq elde júrgende onymen baılanysta bolǵan 138 adamnyń anyqtalǵanyn habarlady. Qazirgi ýaqytta ortalyq qyzmetkerleri atalǵan gıdten koronavırýs juqtyrýy múmkin adamdardy izdeýde.
Al on besinshi aýrý juqtyrǵan naýqas 43-jasar ońtústikoreıalyq vırýs oshaǵy Ýhanda bolǵan. Er adam elge 20 qańtarda oralǵan. Bılik onyń baqylaýda ekenin málimdedi.
Koreıalyq aýrýlardy baqylaý jáne aldyn alý ortalyqtary naýqas adamdardyń qaı jerlerge barǵanyn anyqtap jatry. Sol arqyly ınfektsııa juqtyrýy múmkin adamdardyń sanyn anqytaý kózdelip otyr.
Úkimettiń qolǵa alǵan aýqymdy sharalaryna toqtala ketetin bolsaq, Ýhan qalasy men Hýbeı provıntsııasynan adamdardyń kelýine shekteý jarııalandy, el azamattarynyń densaýlyǵy úshin qaýip tóndirýi múmkin kez kelgen adam aýrýdyń beti qaıtqansha oqshaýlaıtyn qatań shara qoldanylatyny málim etildi.
