Ońtústik Koreıada koronavırýs juqtyrǵan 376 jańa jaǵdaı anyqtaldy
SEÝL. YONHAP-QazAqparat – Ońtústik Koreıada koronavırýs juqtyrǵan 376 jańa jaǵdaı anyqtaldy. Elde vırýs juqtyrǵandardyń jalpy sany 3 526 adamǵa jetti, dep habarlaıdy QazAqparat Yonhap agenttigin silteme jasap.
Elde vırýstan 17 adam kóz jumdy.
Koreıa aýrýdy baqylaý jáne aldyn alý ortalyǵynyń (KCDC) málimetine sáıkes, vırýs juqtyrǵan 376 jańa jaǵdaıdyń 333-i Seýlden ońtústik-shyǵysqa qaraı 300 shaqyrym jerde ornalasqan Tegý qalasynda tirkelse, 26-sy – kórshiles Soltústik Kensando provıntsııasynda.
Sondaı-aq ózge de iri provıntsııalar men qalalarda aýrý juqtyrǵan birneshe jaǵdaı týraly habarlandy. Seýlde taǵy bes adam ınfektsııany juqtyrǵan. Sonymen qatar úlkendigi jaǵynan Ońtústik Koreıanyń ekinshi qalasy Pýsanda da bir turǵynnan vırýs tabylǵan.
Elde tirkelgen ınfektsııanyń 87 paıyzdan astamy Tegý qalasy men Soltústik Kensando provıntsııasyna tıesili.
Aldaǵy kúnderi Ońtústik Koreıada vırýs juqtyrǵandardyń sany artýy múmkin, óıtkeni densaýlyq saqtaý organdary 210 myńnan astam Iısýs Sınchhondjı shirkeýiniń (Shincheonji Church of Jesus) múshesin tekserýdi bastady.
Densaýlyq saqtaý organdary eldegi ınfektsııa juqtyrýdyń jartysynan astamy jergilikti dinı sekta Sınchhondjıge (Shincheonji) qatysty dep kúdiktenip otyr.
Jeksenbi kúni tańerteń Ońtústik Koreıada 32 422 adam tekserýden ótip jatyr Jalpy 61 037 adamnyń taldaýy teris nátıje kórsetti. Saýyǵyp shyqqandar sany 30-ǵa jetti.
Ońtústik Koreıa elinde koronavırýs alǵash ret 20 qańtarda tirkeldi. Ol kezde vırýs órship turǵan Ýhannan kelgen Qytaı azamatshasynyń testinen vırýs tabyldy.
Buǵan deıin habarlaǵandaı, 1 naýryzdan bastap koronavırýsqa baılanysty Qazaqstan Ońtústik Koreıaǵa ushatyn áýe reısteriniń sanyn qysqartty. Sondaı-aq, Qazaqstan elshiligi osy elde júrgen qazaqstandyqtardyń tizimin jasaı bastady.
