Ońtústik Koreıada bolǵan iri jol apatynan 28 adam jaraqat aldy
ChONDJÝ. QazAqparat – Eldiń ońtústik-batysynda tasjolda 20-ǵa jýyq avtokólik soqtyǵysyp, bir adam kóz jumdy jáne 28-i jaraqat aldy, dep habarlaıdy QazAqparat Ońtústik Koreıanyń Renhap agenttigine silteme jasap.
Polıtsııa men órt sóndirý qyzmetiniń málimetinshe, apat búgin saǵat 12:23-te Soltústik Cholla provıntsııasynda Sýnchhon qalasy men Vandjý ýezin biriktiretin tasjoldyń týnnelinde bolǵan.
Polıtsııa oqıǵa ornyn qorshaýǵa aldy. Qazirgi ýaqytta qutqarý jumystary júrip jatyr. Qurbandar sany ósýi múmkin, sebebi hımııalyq zattar salynǵan avtotsısterna órtenip, toksındi gaz taraǵan. Hımııalyq zattar týraly derek ázirge joq.
«Oqıǵa ornynan shyǵyp jatqan qoıý qara tútin qutqarý jumysyn qıyndatyp jatyr. Keltirilgen zalal somasy órt sóndirilgennen keıin belgili bolady», - dep habarlady polıtsııadan.
