Ońtústik Koreıada bir táýlikte 60 adam koronavırýs juqtyrdy
SEÝL. Yonhap - QazAqparat – Sońǵy táýlikte Ońtústik Koreıada 60 adam koronavırýs juqtyrǵan, dep habarlaıdy Yonhap.
Osylaısha, atalmysh dertke shaldyqqandar sany 893-ke jetti. Búgingi kúnge deıin 8 adam koronavırýstan kóz jumǵan.
Úkimet eldegi eki aımaq vırýstyń oshaǵyna aınalǵanyn málim etti, olar – ońtústik-shyǵystaǵy Tegý qalasyndaǵy dinı sekta, al ekinshisi – kórshiles ornalasqan Chhondo shtatyndaǵy aýrýhana. Onda ınfektsııa juqtyrǵandar sany óte jyldam ósip jatyr. Aıta keteıik, Ońtústik Koreıada koronavırýsqa shaldyqqandardyń jartysynan astamy atalmysh aımaqtarda turady.
Sońǵy bir kúnde aýrý juqtyrǵan 60 adamnyń 49-y - Seýlden 300 shaqyrym qashyqtyqta ornalasqan Tegý qalasy men kórshiles Soltústik Kensan provıntsııasynyń turǵyndary.
Іri provıntsııalar men qalalardyń bárinde derlik vırýs juqtyrýdyń jańa jaǵdaılary tirkelgen. Koreıalyq aýrýlardyń aldyn alý jáne baqylaý ortalyǵynyń (KCDC) málimetinshe, Seýlde eki adam qaterli dertke shaldyqsa, Pýsanda – 3 adam, Kengı provıntsııasynda – 5 adam aýrý juqtyrdy.
Eske sala keteıik, keshe ǵana Ońtústik Koreıa úkimeti koronavırýs juqtyrǵandar sany rekordtyq deńgeıge jetkenin jarııalaǵan edi. Al jeksenbide eldegi vırýsty eskertý deńgeıi eń joǵarǵy – «qyzylǵa» deıin kóterildi.
