Ońtústik Koreıada bes kúnnen beri shań-tozań basylmaı tur
ASTANA. QazAqparat - Ońtústik Koreıa aýmaǵynyń basym bóligin shań-tozań basqanynan bes kún boldy, dep habarlaıdy «QazAqparat» HAA Yonhap agenttigine silteme jasap.
Seýldiń batysyndaǵy aýdandardyń birinde atmosferadaǵy usaq dıspersııaly tozań tańǵy segizde 1 tekshe metrde 153 mkg deńgeıine jetken. Aıta keteıik, bir tekshe metr aýadaǵy 76 mkg tozańnyń ózi alańdatarlyq kórsetkish.
Eldiń ortalyq bóligindegi kóptegen oblystarda da aýadaǵy birinshi klasty kantserogenniń joǵary deńgeıi anyqtaldy. Atap aıtqanda, Kanvondo provıntsııasynyń soltústik-batysyndaǵy Vondjý qalasynda atmosferadaǵy shań-tozań deńgeıi 171 kmg kórsetkishine jetti.
Seýlde dúısenbi kúni shań-tozań deńgeıi 118 mkg deńgeıine jetti, bul úkimet baqylaý ornatqan 2015 jyldan bergi eń joǵary kórsetkish.
Seısenbide 10 iri megapolıs jáne provıntsııada jergilikti ózin-ózi basqarýshy organdar shań-tozań deńgeıin tómendetý úshin kólik pen aýaǵa tútin shyǵaratyn nysandardyń qýatyn azaıtyp, shuǵyl sharalar qoldana bastady.
El turǵyndary kóshede maska taǵyp júr.
«Aýanyń lastanǵany sonshalyq, meniń tamaǵym aýyryp tur, ózimdi solǵyn sezinip jatyrmyn. Bul naǵyz qoıý tumanǵa uqsaıdy», - deıdi turǵyndardyń biri.
Meteorologtar búgin kúnniń basym bóliginde tozańnyń deńgeıi joǵary bolatynyn habarlady.
Foto: EPA-EFE
