Ońtústik Koreıada bala qaǵyp ketken qazaqstandyqtyń ápkesi de sol elde zańsyz júrgen
NUR-SULTAN. QazAqparat – Ońtústik Koreıada bala qaǵyp ketken qazaqstandyqtyń ápkesi de sol elde zańsyz júrgen. Bul týraly QR Syrtqy ister mınıstrliginiń resmı ókili Aıbek Smadııarov aıtty, dep habarlaıdy QazAqparat tilshisi.
«Onyń ápkesi de Koreıada zańsyz júrip jumys istegen. Biraq, onyń atalǵan oqıǵaǵa, jol-kólik apatyna esh qatysy joq. Mán-jaıdy anyqtaý jas jigittiń tóńireginde júrgizilýde. Ápkesiniń oqıǵaǵa qatysy joq. Ol qazirgi ýaqytta Qazaqstan aýmaǵyna oraldy jáne úıine ketip barady», - dedi Aıbek Smadııarov.
Eske sala keteıik, biraz ýaqyt buryn Qazaqstan azamaty Ońtústik Koreıada kishkentaı balany qaǵyp, oqıǵa ornynan izin sýytqan edi.
Keıin onyń Pavlodarda júrgeni belgili boldy.
14 qazanda Qazaqstan azamaty tergeý is-sharalaryna qatysý úshin Seýl qalasyna óz erkimen ushyp bardy.
Búgin Qazaqstannyń Ońtústik Koreıadaǵy konsýly tergeýshimen jáne qazaqstandyqpen kezdesedi.
