Ońtústik Koreıada bala qaǵyp ketken qazaqstandyq Pavlodarda júr – SІM

NUR-SULTAN. QazAqparat – Ońtústik Koreıada kishkentaı balany qaǵyp ketken 20 jastaǵy qazaqstandyq Pavlodarda júr. Bul týraly elordada ótken brıfıngte QR Syrtqy ister mınıstrligiń resmı ókili Aıbek Smadııarov málim etti, dep habarlaıdy QazAqparat tilshisi.

«Ol Qazaqstanǵa qashyp ketken. ıAǵnı, ushaqqa bılet alyp, eline jetken. Qazirgi ýaqytta bostandyqta. Pavlodar qalasynda turady. Sol jaqta bizdiń jergilikti quqyq qorǵaý organdary ony taýyp, sóılesti. Koreıa tarapynan arnaıy qujattar kelip tústi. Ol qujattardy Syrtqy ister mınıstri tıisti mehanızm boıynsha Bas prokýratýraǵa joldady. Endi bul másele eki memlekettiń quqyq qorǵaý organdarynyń arasynda sheshiledi», - dedi Aıbek Smadııarov.

Onyń aıtýynsha, Qazaqstan tarapynan 1999 jylǵy jigitke eshqandaı bultartpaý sharasy qoldanylmaǵan. QR SІM resmı ókili buny qylmystyń Qazaqstan aýmaǵynda jasalmaǵanymen túsindirdi.

«Ol úıinde. Bostandyqta júr. Tek Koreıa tarapynyń qujaty negizinde is qarastyrylady», - dedi ol.

Osydan birshama ýaqyt buryn Qazaqstan azamaty Ońtústik Koreıada kishkentaı balany qaǵyp, oqıǵa ornynan izin sýytqany habarlanǵan bolatyn.

«QR SІM Koreıa Respýblıkasynda oryn alǵan oqıǵany biledi. Qazirgi ýaqytta bizge belgili málimetterge sensek, Qazaqstan azamaty rasynda kishkentaı balany qaǵyp ketip, zardap shekken balany jolda qaldyryp, oqıǵa ornynan qashyp ketken», - dep habarlaǵan edi QR SІM resmı ókili Aıbek Smadııarov.