Ońtústik Koreıada aptap ystyq 17 adamnyń ómirin qıdy

SEÝL. QazAqparat – Ońtústik Koreıada demalys kúnderi aptap ystyqtan 17 adam qaıtys boldy. Olardyń kóbi kúnniń ystyǵynda dalada jumys istegen egde jastaǵy fermerler, dep habarlaıdy QazAqparat Ońtústik Korıanyń Renhap agenttigine silteme jasap.

Aptap ystyq týraly alǵashqy maýsymdyq eskertýler kúshine engennen keıin eldegi eń joǵary temperatýra 35 Tselsıı gradýsqa deıin kóterildi.

Koreıanyń aýrýlardyń aldyn alý jáne baqylaý agenttigi men eldiń órt sóndirý kúzeti qyzmetiniń málimeti boıynsha, demalys kúnderi aptap ystyqtan 17 adam mert bolǵan.

Soltústik Kensan provıntsııasynda 7 fermer qaza tapty.

Kensan provıntsııalyq qalasynda 60 jastaǵy azamat esinen tanyp, onyń dene temperatýrasy 39,2 S kórsetken. Ol aýrýhanaǵa jetkizilgenimen, júregi toqtap qalǵan bolatyn.

60 jastaǵy er adam Sochhon provıntsııasynda beıittiń shóbin julyp jatqanda kún ótip, qaıtys boldy. Dál sol óńirde fermer jumys istep júrip mert boldy. Ony tapqan kezde dene temperatýrasy 41 gradýs bolǵan.

80 jastaǵy fermer jeksenbi kúni Mýngen qalasynda jumys istep júrip esinen tanyp qaıtys bolsa, taǵy bir 80 jastaǵy fermer Echhon okrýginde mer boldy.

Taǵy eki fermer Soltústik Chhýnchhon jáne Kengıda provıntsııalarynda jumys istep júrip qaza tapty.

Bılik ókilderiniń sózinshe, qaza tapqan adamdardyń barlyǵyn tapqan kezde dene temperatýrasy joǵary bolǵan.

Koreıa aýrýlardyń aldyn alý jáne baqylaý agenttiginiń dereginshe, senbi kúni alty adam boljam boıynsha ystyqtan qaıtys bolsa, jeksenbi kúni 16:00-degi jaǵdaıy boıynsha 73 adam ystyqqa baılanysty syrqattan zardap shekken.