Ońtústik Koreıada apatqa ushyraǵan «Sevol» kemesiniń iz-tússiz ketken jolaýshylaryn izdeý jumystary toqtatyldy
ASTANA. QazAqparat - Іzdeý-qutqarý operatsııasynyń shtaby Ońtústik Koreıada sýǵa batqan "Sevol" paromynda izdestirý jumystaryn toqtatý týraly sheshim qabyldady. Bul týraly "Choson ılbo" gazeti jazady, dep habarlaıdy TASS.
Onyń málimetinshe, áli kúnge deıin iz-túzsiz joǵalǵan bolyp esepteletin toǵyz jolaýshynyń januıasy bıliktiń muzdaı sýdyń astynda jatqan paromda izdestirý jumystaryn jalǵastyrý múmkin emes degen paıymymen kelisti.
Sý astyndaǵy izdeý jumystaryna tartylǵan jeke kompanııalardyń qyzmetkerleri jumysty toqtatyp, 2 muhıt barjasyn alyp shyǵýǵa bel býdy. Bul barjalarsyz Ońtústik Koreıanyń áskerı-teńiz kúshteriniń jáne jaǵalaýdaǵy kúzet qyzmetiniń súńgýirleriniń izdeý jumystarynyń tıimdiligi tómendeıdi.
Bılik ókilderi jeke kompanııalardy izdestirý jumystaryn jalǵastyrýǵa kóndire almady. Fırma basshylyqtarynyń aıtýynsha, endigi izdeý jumystary nátıje bermeıdi, dep jazady basylym.
Esterińizge sala keteıik, bortynda 476 jolaýshysy men ekıpaj músheleri bar «Sevol» kemesi 16 sáýir kúni Koreı shyǵanaǵynyń ońtústik-shyǵys bóliginde batyp ketken bolatyn. Qurban bolǵandar sany 295 adam, al taǵy 9 jolaýshy ázirge iz-tússiz ketkender sanatynda.
