Ońtústik Koreıada 60-qa jýyq avtomobıl soqtyǵysyp, 28 adam zardap shekti
ASTANA. QazAqparat - Koreıa Respýblıkasynyń Inchhon Halyqaralyq áýejaıynyń mańyndaǵy kópirde iri jol kólik apaty oryn aldy. Bul týraly TASS habarlady.
Ońtústik koreıalyq Renhap agenttiginiń aqparatynsha, kópirde 60-qa jýyq avtomobıl soqtyǵysqan. Onyń ishinde mektep avtobýsy da bar.
Kelip túsken aqparatqa sáıkes, oqıǵa saldarynan shamamen 28 adam japa shekti. Ázirge qaza tapqandar týraly habar joq. Qazirgi ýaqytta Seýldan 70 shaqyrym jerde ornalasqan Inchhon áýejaıynyń mańyn tuman basty. Іri apattyń oryn alýyna bul da sebep bolýy múmkin.
