Ońtústik Koreıa Soltústik Koreıamen shekarada qatelesip, pýlemettan oq atty
ChHÝNChHON. RENHAP - QazAqparat – Ońtústikkoreıalyq soldat oqý-jattyǵý kezinde Soltústik Koreıamen shekarada abaısyzda pýlemetten oq atyp jiberdi. Áskerıler tez arada Soltústik Koreıaǵa habar jiberip, oq ádeıi atylmaǵanyn jetkizgen, dep habarlaıdy QazAqparat Renhap agenttigine silteme jasap.
Ońtústik Koreıa áskerıleri shyǵystaǵy Kanvondo provıntsııasyndaǵy Koreıa shekarasyna jaqyn mańda áskerı bólimsheniń oqý-jattyǵýy kezinde, senbi kúni saǵat 18:27-de pýlemetten tórt ret oq atylǵanyn málimdedi.
Oqtyń bári áskerı demarkatsııalyq shekaranyń ońtústik bóligine túsken, zaqym kelgeni týraly aqparat joq. Oqý-jattyǵý kezinde oq atylatyny josparlanbaǵan.
Resmı tulǵalardyń sózinshe, áskerı bólimshe Soltústik Koreıaǵa birneshe ret oq ádeıi atylmaǵanyn radıo arqyly habarlady. Dese de tótenshe jaǵdaıǵa daıyndyǵyn kúsheıtti.
«Soltústik Koreıa jaqtan erekshe eshteńe baıqalmaıdy, oqıǵanyń naqty qalaı bolǵany tergelip jatyr», - dedi bólimshe ókili.
2020 jyldyń mamyrynda Soltústik Koreıadan Ońtústik Koreıanyń demılıtarızatsııalanǵan aımaǵynyń ortalyq bóligindegi kúzet ornyna tórt oq tústi, Ońtústik Koreıa áskeri jaýap retinde oq jaýdyrýǵa májbúr boldy.
Bul Ońtústik jáne Soltústik Koreıa arasyndaǵy uzaq ýaqyt tynyshtyqtan keıingi atys edi. 2018 jyldyń qyrkúıeginde qol qoıylǵan áskerı kelisim boıynsha, eki Koreıa bir-birine degen qastandyq áreketterin toqtatyp, shıelenisti azaıtyp, senimdi ulǵaıtý týraly kelisken bolatyn.
Uzyndyǵy 250 jáne eni 4 shaqyrym bolatyn demelıtarızatsııalanǵan aýmaq álemdegi eń kúshti shekaralardyń biri sanalady. Osy jer básekeles Koreıalar arasyndaǵy janjal ornyna jıi aınalatyn edi.
Foto: en.yna.co.kr
