Ońtústik Koreıa Soltústik Koreıamen aradaǵy daýly shekara mańynda áskerı jattyǵý júrgizýde
ASTANA. Tamyzdyń 5-i. QazAqparat -Ońtústik Koreıanyń Áskerı-teńiz kúshteri Sary teńizde, Soltústik Koreıamen aradaǵy daýly shekara mańynda jattyǵýlaryn bastady.
Jattyǵý barysynda ońtústikkoreılik teńizshiler áleýetti qarsylastyń súńgýir qaıyqtarymen kúresýdiń túrli joldaryn ıgeretin bolady. Áskerı-teńiz manevrine Ońtústik Koreıa armııasy men flotynyń 29 kemesi, 50 ushaǵy jáne 4,5 myń áskerı qyzmetkeri qatysatyn bolady, dep habarlady RBK agenttigi.
Buǵan deıin Koreıa Halyq Demokratııalyq Respýblıkasy jattyǵý bastalǵan jaǵdaıda qarap otyrmaıtynyn málim etken bolatyn. Phenıan ol úshin ıadrolyq áleýetin de qoldanýǵa daıyn ekenin málim etip, azamattyq kemelerdi jattyǵý aýmaǵynan alys bolýǵa shaqyrdy. Seýl, bul qoqan-loqqyǵa qulaq asqan joq.
Jattyǵý naýryz aıynyń aıaǵynda Sary teńizde bolǵan ońtústikkoreılik «Chhonan» korvetiniń apatyna jaýap bolyp otyr. Ol tótenshe oqıǵanyń saldarynan 46 teńizshi qaza tapqan edi. Seýl kemege Soltústik Koreıa shabýyl jasady dep aıyptady. Biraq Phenıan bul aıyptaýdy teriske shyǵardy.
