Ońtústik Koreıa prokýratýrasy eks-prezıdent Pak Kyn Heni qamaýǵa alý jóninde order suratty
ASTANA. QazAqparat - Koreıa Respýblıkasynyń prokýratýrasy burynǵy prezıdent Pak Kyn Heni qamaýǵa alý týraly order suratyp, sotqa resmı saýal joldady. Bul týraly Kyodo agenttigi habarlady.
TASS habarlaǵandaı, 22 naýryzda Pak Kyn He birneshe saǵat boıy tergeý suraqtaryna jaýap bergen bolatyn, sonyń qorytyndysy boıynsha respýblıka prokýratýrasy ony qamaýǵa alý múmkindigin qarastyrýda.
Aıta keteıik , Pak Kyn He kúdikti retinde tergeýge alynǵan Ońtústik Koreıa tarıhyndaǵy tórtinshi prezıdent atanyp otyr. Buǵan deıin mundaı jaǵdaı Ro De Ý, Chon Dý Hvan jáne No Mý Henmen bolǵan edi. Alǵashqy eki prezıdent túrli jazaǵa tartylsa, No Mý Hen óz-ózine qol jumsady.
Pak Kyn Hege bılikti asyra paıdalaný, sybaılas jemqorlyq sekildi 13 tarmaq boıynsha aıyp taǵylyp otyr.
Eske sala ketsek, Ońtústik Koreıanyń Konstıtýtsııalyq soty prezıdent Pak Kyn Hege jarııalanǵan ımpıchmentti maquldady. Merzimnen tys jańa prezıdenttik saılaý saılaý 9 mamyrda ótýi múmkin.
Pak Kyn He eldiń burynǵy prezıdentterine beriletin artyqshylyqtardan: jalaqynyń 70% kólemindegi ómirlik zeınetaqydan (shamamen 12 mıllıon von nemese $10,4 myń), úsh kómekshiden, jeke júrgizýshi men memlekettik klınıkalardaǵy tegin medıtsınalyq qyzmet kórsetýden aıyrylady. Sonymen birge, oǵan 10 jylǵa emes, tek 5 jylǵa kúzet beriledi.
