Ońtústik Koreıa prezıdentiniń burynǵy eki kómekshisi tutqyndaldy
ASTANA. QazAqparat - Prezıdent Pak Kyn Heniń eki burynǵy kómekshisi bopsalaý, qyzmettik jaǵdaıyn asyra paıdalaný jáne qupııa derekterdi taratý boıynsha aıyptalýda. Úshinshi burynǵy qyzmetker tergeýge shaqyryldy, dep habarlaıdy dw.com.
Ońtústik Koreıa prokýratýrasy saıası daı-damaıǵa ushyraǵan el prezıdenti Pak Kyn Heniń burynǵy kómekshilerin tutqyndaý týraly order berdi. Saıasatty úılestirý boıynsha burynǵy jaýapty hatshy An Chon Bom jáne prezıdenttiń taǵy bir kómekshisi Chon Ho Son qamaýǵa alyndy.
Burynǵy ákimshilik qyzmetkerleri bopsalaý, qyzmettik jaǵdaıyn asyra paıdalaný jáne qupııa derekterdi taratý boıynsha aıyptalýda. Tergeý málimetteri boıynsha, Pak Kyn He eshqandaı resmı laýazymy joq qurbysynyń yqpalynda bolǵan, qurbysy onyń sóıleıtin sózin túzegen, qupııa qujattarmen jumys istegen jáne úkimettik emes uıymdardyń qyzmeti úshin mıllıondaǵan dollarǵa ıe bolǵan.
5 qarasha kúni Seýlde on myńdaǵan adam ereýilge shyǵyp, prezıdenttiń otstavkaǵa ketýin talap etti. Bir kún buryn Pak Kyn He bolǵan is úshin keshirim surap, tergeýge kómektesetinin aıtyp halyqqa úndeý joldady.
