Ońtústik Koreıa prezıdenti ıÝn Sok El resmı saparmen Qazaqstanǵa keledi

ASTANA. QazAqparat - Ońtústik Koreıa Respýblıkasynyń prezıdenti ıÝn Sok Eldiń Qazaqstanǵa sapary josparlanyp otyr. Bul týraly QR Premer-Mınıstriniń orynbasary – Syrtqy ister mınıstri Murat Nurtileý málim etti, dep habarlaıdy QazAqparat tilshisi.

«Búgin Ońtústik Koreıa Respýblıkasynyń syrtqy ister mınıstri Pak Jın myrzamen ashyq ári nátıjeli kelissóz ótkizdik. Onyń qorytyndysy boıynsha ózara ózekti máselelerdi jan-jaqty talqylaýǵa jaqsy múmkindik týdy dep oılaımyn. Osy oraıda mınıstr Pak Jınge jáne Ońtústik Koreıa syrtqy ister mınıstrliginiń delegatsııasyna elimizge resmı saparmen kelgeni úshin taǵy da alǵys aıtamyn. Ońtústik Koreıamen dostyq, ózara senim men konstrýktıvke negizdelgen áriptestikti damytý - elimizdiń syrtqy saıasatyndaǵy mańyzdy basymdyqtyń biri», - dedi Murat Nurtileý Ońtústik Koreıa Respýblıkasynyń syrtqy ister mınıstri Pak Jınniń elimizge sapary barysynda uıymdastyrylǵan brıfıngte.

Mınıstr ekijaqty senimdi áriptestiktiń dáleli retinde Memleket basshysy Qasym-Jomart Toqaevtyń 2021 jylǵy tamyzdaǵy Ońtústik Koreıaǵa memlekettik saparyn keltirdi.

Atalǵan sapar barysynda ekijaqty qarym-qatynas keńeıtilgen strategııalyq áriptestik deńgeıine kóterilgen.

«Sondaı-aq, áriptesimmen kelesi jyly Ońtústik Koreıa Respýblıkasynyń prezıdenti ıÝn Sok El myrzanyń Qazaqstanǵa saparyn uıymdastyrýǵa jáne ony joǵary deńgeıde ótkizýge kúsh salamyz dep kelistik. Sonymen qatar, Úkimet pen Parlament músheleriniń saparyn ótkizý saıası dıalog pen yqpaldastyqty nyǵaıtý turǵysynan mańyzdy ekeni týraly ortaq pikir qalyptasqany qýantarlyq jaıt», - dedi M. Nurtileý.