Ońtústik Koreıa Prezıdenti «Sevol» paromynyń apatqa ushyraǵany úshin jaýapkershilikti óz moınyna aldy
ASTANA. QazAqparat - Ońtústik Koreıa Prezıdenti Pak Kyn He «Sevol» paromynyń apatqa ushyraǵany úshin jaýapkershilikti óz moınyna aldy. Oǵan qosa, atalǵan oqıǵaǵa qatysty ulttyq jaǵalaý kúzetiniń taratylatynyn málimdedi, dep habarlaıdy France-Presse agenttigi.
«Qaıǵydan qusa bolǵan halqymnyń aldynda Ońtústik Koreıa turǵyndarynyń ómiri men qaýipsizdigine jaýapty prezıdent retinde keshirim suraımyn», - dedi Pak Kyn He. «Ne bolsa da, bul apatqa men jaýaptymyn», - dep qosty ol. Prezıdent jaǵalaý kúzetiniń qyzmetkerleri atalǵan qaıǵyly jaǵdaıǵa dereý áreket etý boıynsha sharany sátsiz júrgizgenin alǵa tartyp, budan da kóp adamdy aman alyp qalýǵa bolar edi degen oı aıtty. Buǵan deıin Ońtústik Koreıalyq «Sevol» paromymen birge 286 adam sýǵa ketken týraly habarlanǵan bolatyn. «Men jaǵalaý kúzetin taratý týraly sheshim qabyldadym», - dep málimdegen prezıdent teńiz habaryn baqylaý qaıta qurylǵan ulttyq qaýipsizdik mınıstrligine tapsyrylatynyn atap ótti.
