Ońtústik Koreıa Prezıdenti Qasym-Jomart Toqaevty Seýlge saparmen kelýge shaqyrdy
Ońtústik Koreıanyń Prezıdenti Mýn Chje In quttyqtaýynda eki el arasyndaǵy strategııalyq áriptestiktiń nyǵaıa túsetinine senim bildirip, Memleket basshysyn Seýlge saparmen kelýge shaqyrdy.
«Qos tarapqa qolaıly ýaqytta Ózińizben Seýl qalasynda taǵy da kezdesip, eki el arasyndaǵy yntymaqtastyqty damytý boıynsha jasampaz dıalogymyzdy jalǵastyrýǵa daıynmyn», - delingen jedelhatta.
Iran Islam Respýblıkasynyń Prezıdenti Hasan Rýhanı Qasym-Jomart Toqaevqa tabys, Qazaqstan halqyna baq-bereke tilep, eki eldiń kópjaqty qarym-qatynastarynyń tereńdeı túsetinine senim bildirdi.
Lıýksembýrgtiń Premer-Mınıstri Ksave Bettel Qazaqstan Prezıdentine qurmet bildirip, tabys tiledi.
«Men Qazaqstan men Lıýksembýrg arasyndaǵy dostyq qarym-qatynasty damytý úshin Sizben yntymaqtastyqty jalǵastyrýǵa múmkindik týǵanyna qýanyshtymyn», - delingen jedelhatta.
Lıtva Respýblıkasynyń Prezıdenti Dalıa Grıbaýskaıte óz quttyqtaý hatynda Lıtva men Qazaqstan arasyndaǵy eki jaqty deńgeıdegi dostyq qarym-qatynastar men ózara dıalogty jalǵastyrýǵa, sondaı-aq Eýropalyq Odaq aıasyndaǵy ekijaqty qarym-qatynasymyzdyń qarqyny tómendemeıtinine senim bildiremin. Bul bizdiń elderimiz ben azamattarymyz úshin memleketterimizdiń ekonomıkalyq ósimin arttyrýǵa, sondaı-aq bizdiń halyqtarymyzdyń ál-aýqatyn nyǵaıtýǵa, yntymaqtastyqty odan ári keńeıtýge jańa múmkindik ashatynyna kámil senemin, - dep jazǵan.
Eýrazııalyq ekonomıkalyq komıssııa alqasynyń tóraǵasy Tıgran Sarkısıan Qasym-Jomart Toqaevtyń aıqyn jeńisi Qazaqstannyń zamanaýı ári serpindi memleket retinde odan ári senimdi damýynyń negizi bolatynyn atap ótti.
«Bizdiń ıntegratsııalyq birigýimizdiń damýyna Sizdiń qatysýyńyz Odaqtyń turaqty, maqsatshyl jolmen júrýine jáne álemdik ekonomıkanyń qozǵaýshy kúshine aınalýyna septigin tıgizerine senimdimin», - dedi Tıgran Sarkısıan.
Sondaı-aq, Qasym-Jomart Toqaevtyń atyna Ujymdyq qaýipsizdik sharty uıymy Bas hatshysynyń mindetin atqarýshy Valerıı Semerıkov, Shanhaı yntymaqtastyq uıymynyń Bas hatshysy Vladımır Norov, Túrki keńesiniń Bas hatshysy Baǵdat Ámreev, TÚRKSOI uıymynyń Bas hatshysy Dúısen Qaseıinov, Jalpyǵa ortaq eńbek federatsııasynyń Bas hatshysy Vladımır Şerbakov, «Gazprom» kópshilik aktsıonerlik qoǵamynyń basqarma tóraǵasy Alekseı Mıller quttyqtaý joldady.
