Ońtústik Koreıa: Phenıan Jer serigin orbıtaǵa sátti shyǵardy
ASTANA. QazAqparat - Soltústik Koreıa óz Jer serigin orbıtaǵa shyǵara aldy, biraq onyń jumys isteıtini-istemeıtini ázirge belgisiz, dep habarlady Ońtústik Koreıanyń Qorǵanys mınıstrligine siltememen Bı-bı-sı.
Esimin atamaǵan Amerıka bıliginiń ókili Sı-en-en kompanııasyna KHDR shyǵarǵan serik orbıtada baqylaýsyz aınalyp júrgenin jáne qandaı da bir paıdaly qyzmetterdi oryndaýǵa qabiletsiz ekenin málimdedi.
Phenıan jeksenbi kúni shyǵarylǵan seriktiń kommýnıkatsııalyq qyzmetterdi oryndap otyrǵanyn, al ony orbıtaǵa shyǵarý boıynsha barlyq is-qımyldar tabysty ótkenin málim etti.
Halyqaralyq qoǵamdastyq Phenıannyń áreketterin aıyptady. BUU Qaýipsizdik keńesiniń rezolıýtsııalary Phenıanǵa ıadrolyq tehnologııalar, sondaı-aq ballıstıkalyq zymyrandardy shyǵarýmen baılanysty kez kelgen qyzmetti júzege asyrýǵa tyıym salyp otyr.
QK-niń tótenshe otyrysynda qabyldanǵan mádimdemede aldaǵy ýaqytta Soltústik Koreıaǵa qatysty sanktsııalardy engizý týraly rezolıýtsııanyń qarastyrylatyny jazylǵan. Bul Soltústik Koreıanyń BUU jarǵysyn óreskel buzyp otyrǵanyna jaýap bolmaq.
AQSh aldaǵy ýaqytta Ońtústik Koreıaǵa qoldaý kórsetip, onyń aýmaǵynda zymyranǵa qarsy zamanaýı keshendi salatynyn málimdedi.
