Ońtústik Koreıa oppozıtsııasy lańkestikpen kúres týraly zańdy qabyldaýǵa kelispeı jatyr
ASTANA. QazAqparat - Ońtústik Koreıada parlamenttegi oppozıtsııa depýtattary lańkestikpen kúres boıynsha zańnyń qabyldaýyna kedergi keltirip jatyr. Oppozıtsııa ókilderi parlamentte sóz sóıleý múmkindigin paıdalanyp, barynsha sozyp, uzaǵyraq sóılep, qarsylyq tanytýda, dep jazdy «bbc» agenttigi.
Osylaısha, parlament sheshim qabyldaı almady. Oppozıtsıonerlerdiń sóz sóıleýi altynshy kúnge sozyldy. Jeksenbige qaraǵan keshte oppozıtsııa depýtattary 115 saǵat sóz sóıledi.
Oppozıtsııanyń qaryslyq tanytyp otyrǵan basty ýáji: «zań jobasy Ońtústik Koreıadaǵy adam quqyǵyna qaýip tóndiredi» degen pikir. Óıtkeni, ol eldiń barlaý qyzmetine jeke habarlamalar men telefon áńgimelerin tyńdaýǵa ruqsat beredi.
Eń uzaq sóz 11 saǵat 39 mınýtqa sozyldy. Sóz sóılegenderdiń keıbireýleri án aıtsa, endi bireýleri Djordj Orýelldiń «1984 jyl» kitabynan úzindiler oqydy.
