Ońtústik Koreıa oppozıtsııasy el prezıdentine ımpıchment jarııalaýdy talap etýde
ASTANA. QazAqparat - Ońtústik Koreıa prezıdenti Pak Kyn He aınalasyndaǵy jemqorlyq daýyna baılanysty el oppozıtsııasy onyń ımpıchmentine qol jetkizý týraly sheshim qabyldady, dep habarlaıdy RIA Novostı.
Agenttiktiń habarlaýynsha, sheshimdi eń basty oppozıtsııa Demokratııalyq partııanyń ("Tobýro mındjýdan") parlamenttik fraktsııasy qabyldaǵan. «Impıchment alty aıǵa deıin sozylýy múmkin, sondyqtan bul aıtarlyqtaı memleket kúshin qajet etedi jáne bıleýshi "Senýrıdan" partııasyndaǵy Pak Kyn He qarsylastarynyń ar-ojdanyna baılanysty», - dep málimdedi partııa basshysy Chhý Mı E.
Renhap agenttiginiń habarlaýynsha, jaqyn arada ózge partııalar da ımpıchment boıynsha óz pozıtsııalaryn bildiredi. El parlamentiniń plenarlyq otyrysy 22 qarashaǵa belgilengen.
Buǵan deıin habarlanǵandaı, prezıdent Pak Kyn He oǵan qatyspaý týraly sheshim qabyldady. Sondaı-aq, ońtústikkoreıalyq BAQ-ta prezıdenttiń bul aptada mınıstrler kabınetiniń otyrysyna qatyspaıtyny týraly aqparat paıda boldy.
Ońtústik Koreıadaǵy jemqorlyq daýy prezıdenttiń qurbysy Tsoı Sýn Sıldiń bılik isine aralasýy týraly aqparattan týyndady. Prokýratýranyń aldyn ala boljaýynsha, qazirgi el prezıdentiniń daýǵa qatysy bar. Konstıtýtsııa boıynsha, ony tergeýge bolmaıdy, alaıda Pak Kyn He óz erkimen túsinikteme berýi múmkin. Qandaı jaǵdaıda da, ol 4 qarasha kúni halyqqa úndeý joldaýǵa ýáde bergen. Daýǵa qatysty elde túrli narazylyqtar men onyń otstavkaǵa ketýin talap etken sherýler ótýde.
