Ońtústik Koreıa men KHDR ortaq hokkeı komandasyn quratyn boldy
SEÝL. QazAqparat - Sársenbi kúni Ońtústik Koreıa men KHDR hokkeıden ortaq áıelder komandasyn qurý týraly kelisimge keldi. Sondaı-aq eki el Phenchhande ótetin qysqy Olımpıada oıyndarynyń ashylý rásiminde sportshylardyń birlesken protsessııasyn uıymdastyrýdy josparlap otyr, dep habarlaıdy Renhap agenttigi.
Soltústik Koreıa 9-25 aqpan aralyǵynda Ońtústik Koreıada ótetin qysqy Olımpıadaǵa 400 adamnan turatyn delegatsııa jibermek. Taraptar mundaı kelisimge QHDR sportshylarynyń Olımpıadaǵa qatysýy talqyǵa túsken májilis barysynda, sársenbi kúni kelgen.
Atalmysh kelisim eki eldiń uzaq ýaqyttan beri sýyǵan qarym-qatynastarynan keıingi úlken serpilis bolǵaly otyr.
Eger halyqaralyq ortaq komanda osy aptada ótetin Olımpıada komıtetiniń kezdesýinde maquldanatyn bolsa, bul koreıalyq eki memlekettiń Olımpıada oıyndaryna alǵash ret ortaq komanda uıymdastyrýy bolady.
Ońtústik Koreıanyń Biriktirý isi jónindegi mınıstrliginiń ókili ortaq komanda qurý men Olımpıadanyń ashylýynda ótetin birlesken protsessııa ońtústik jáne soltústik Koreıanyń birligin kórsetetinin málimdedi.
Kelissózderden keıingi málimdemesinde Soltústik Koreıa qysqy Olımpıadaǵa 230 adamnan turatyn qoldaý tobyn jáne 30 adamnan turatyn thekvonda ókilderin jiberetinin aıtty. Buǵan qosa, QHDR Olımpıadaǵa óziniń 140 bıshileri men mýzynkanttaryn jibermekshi.
Renhap agenttiginiń habarlaýynsha, Soltústik Koreıa koreıaaralyq shekarany basyp ótý úshin jermen júrip ótetin baǵytty alǵash ret 2016 jyly usynǵan.
Naýryz aıynyń ortasynda ótetin paralımpıada oıyndaryna keletin bolsaq, Soltústik Koreıa bul sharaǵa 150 adamnan turatyn sportshylar men qoldaýshy topty jibermek.
