Ońtústik Koreıa men KHDR kelissózderdi jalǵastyrady

SEÝL-ASTANA. QazAqparat - Kelesi aptada resmı Seýl men Phenıan KHDR delegatsııasynyń Phenchhandaǵy qysqy Olımpıada oıyndaryna qatysýy máselesin egjeı-tegjeıli talqylaý úshin kelissózderge kirisedi, dep habarlaıdy Ońtústik Koreıanyń Renhap aqparat agenttigi.

Ońtústik Koreıanyń Birigý isteri jónindegi mınıstrligi jeksenbi kúni kelissózderdiń 15 qańtarǵa belgilengenin málimdedi. Taraptar KHDR-nyń 9-25 aqpan kúnderi ótetin Olımpıadaǵa óz bıshileri men mýzykanttaryn jiberý josparyn talqylaıdy.

«Biz Soltústik Koreıamen kelissózderdi tańǵy 10-da bastaýdy usyndyq. Kelissózderdiń egjeı-tegjeıli baǵdarlamasy búgin jasalýy tıis», - deıdi mınıstrliktiń ókili.

Bul resmı Seýl men Phenıan arasyndaǵy osy aıdaǵy ekinshi kelissóz bolmaq. Mınıstrler deńgeıindegi sońǵy eki jyldaǵy alǵashqy kezdesý 9 qańtar kúni Phanmýndjom shekaralyq beketinde boldy.

Aıta keterligi, kelissózder aıasynda Soltústik Koreıa Olımpıada oıyndaryna sportshylardan bólek, bıshilerin, mýzykanttaryn, thekvondodan kórneki komandasyn, tipti jýrnalısterdi de jiberýdi usyndy.

Bul jolǵy kezdesýde, boljam boıynsha, Soltústik Koreıa delegattarynyń sany, delegatsııanyń Olımpıadaǵa kelý-ketý baǵdary, sondaı-aq soltústikkoreıalyq ánshileri men bıshileriniń óner kórsetýine qatysty máseleler jan-jaqty talqylanady.