Ońtústik Koreıa KHDR-men shekaradaǵy úgit-nasıhatty toqtatady
ASTANA. QazAqparat - Ońtústik Koreıa bıligi dúısenbiden bastap kelesi aptaǵa josparlanǵan koreıaaralyq sammıt qarsańynda KHDR-men shekarada daýys zoraıtqyshy arqyly taratylyp kelgen úgit-nasıhatty toqtatady, dep habarlaıdy Yonhap agenttigi respýblıkanyń ulttyq qorǵanys mınıstrligine silteme jasap.
«Ulttyq qorǵanys mınıstrligi dúısenbiden bastap Soltústik Koreıaǵa qarsy baǵyttalǵan áskerı-demarkatsııalyq jelige jaqyn jerde daýys zoraıtqysh arqyly habar taratýdy toqtatty», - dep keltiredi Yonhap agenttigi vedomstvonyń málimdemesin.
Qorǵanys mınıstrliginde atalyp ótkendeı, mundaı qadam «Ońtústik pen Soltústik arasyndaǵy áskerı shıelenisti azaıtýǵa jáne beıbit kelisimder úshin jaǵdaı týdyrýǵa» baǵyttalǵan.
Ońtústik Koreıa KHDR-ge qarsy úgit-nasıhat habaryn taratýdy 1963 jyly bastaǵan, Phenıan da respýblıkaǵa qarsy osyndaı sharalardy qoldanǵan. 2015 jyly eki el shekarada úgit-nasıhat habaryn taratýdy toqtatý týraly kelisim jasaǵan, alaıda 2016 jyldyń qańtarynda Seýl KHDR ıadrolyq qarýdy synaqtan ótkizgennen keıin daýys zoraıtqyshty qaıta qoldana bastady.
Koreıa Respýblıkasynyń delegatsııasy 5 naýryzda KHDR kóshbasshysy Kım Chen Ynmen Phenıanda kezdesti. Kelissózder barysynda eki eldiń kóshbasshylarynyń kezdesýin ótkizý týraly kelisimge qol jetkizildi. 21 sáýirde Kım Chen Yn Koreıa Eńbek partııasy plenarlyq sessııasynyń qorytyndysy boıynsha KHDR-dyń ıadrolyq jáne zymyran synaqtaryn toqtatatynyn málim etti.
Foto: Yonhap
