Ońtústik Koreıa elshiligi qazaqstandyq dárigerlerge gýmanıtarlyq kómek kórsetti
NUR-SULTAN. QazAqparat - Koreıa Respýblıkasynyń Qazaqstandaǵy Elshiligi otandyq medıtsına mamandaryna gýmanıtarlyq kómek kórsetti, dep habarlaıdy QazAqparat tilshisi.
«Aldymen aıtýly is-sharaǵa ýaqyt bólip kelgenderińiz úshin barshańyzǵa alǵys bildiremin. Búgingi gýmanıtarlyq kómek «Qaıyrymdy ister marafony» aıasynda koronavırýs indetimen kúreste aldyńǵy shepte júrgen medıtsına mamandaryna arnalady. Dárigerlerdiń COVID-19 indetimen kúrestegi eńbegi zor jáne biz usynǵan kómek óz járdemin tıgizedi dep oılaımyz. Vırýspen kúres maqsatynda Koreıa Respýblıkasy Qazaqstan Respýblıkasymen jan-jaqty yntymaqtastyqta, birlesip jumys isteıdi. Sonyń dáleli ótken jyly Koreı Respýblıkasy Qazaqstan jáne Dúnıejúzilik densaýlyq saqtaý uıymy bolyp, birlesip, úshjaqty kelisim aıasynda bizdiń el Qazaqstanǵa 800 myń dollar kóleminde qarjy bóldi. Odan bólek, balalar men qarttar úıi, osal topqa jatatyn jandarǵa jáne bilim berý mekemelerine gýmanıtarlyq kómek joldandy», - dedi Koreıa Respýblıkasynyń Qazaqstandaǵy Elshisi Ký Hong-sok.
Sondaı-aq, elshi myrza eki el arasyndaǵy dostyq yntymaqtastyq odan ári óz jalǵasyn tabatynyn alǵa tartty.
«Búgin Koreıa Respýblıkasynyń Qazaqstandaǵy Elshiligi elimizdiń 4 aımaǵyndaǵy 8 medıtsınalyq mekemege gýmanıtarlyq kómek kórsetip otyr. Onyń qatarynda Nur-Sultan qalasy, Qyzylorda, Qostanaı jáne Pavlodar oblysy bar. Gýmanıtarlyq kómek medıtsına qyzmetkerlerine arnalǵan. Atap aıtqanda, qorǵanysh kostıými (kombınezon), antıseptık, medıtsınalyq qolǵap jáne taǵy basqa vırýstan qorǵaıtyn quraldar bar», - dedi QR Parlamenti Májilisiniń depýtaty, Ulttyq volonterler jelisiniń tóraǵasy Vera Kım.
Onyń aıtýynsha, Ońtústik Koreıa Respýblıkasy tarapynan gýmanıtarlyq kómek buǵan deıin de júzege asyryldy jáne aldaǵy ýaqytta ta odan ári jalǵasyn tabatyn bolady.
