Ońtústik Koreıa elde koronavırýs derti taralýynyń aıaqtalýy týraly jarııalady
ASTANA. QazAqparat - Koreıa Respýblıkasy elde taıaýshyǵystyq respıratorlyq sındromy (MERS) koronavırýsy taralýynyń aıaqtalýy týraly jarııalady. Bul týraly eldiń premer-mınıstri Hvan Ge An málimdedi, dep habarlaıdy TASS.
«Túrli faktorlardy egjeı-tegjeıli qarastyrǵan soń, úkimet ókilderi men medıtsınalyq qyzmetkerler bul derttiń endi azamattarǵa qaýip tóndirmeıtinin túıindedi», - dep atap ótti ol densaýlyq saqtaý jáne áleýmettik qamtý mınıstrliginiń ókilderimen bolǵan kezdesýde.
Premer halyqtyń aldynda úkimettiń aýrýdyń taralýyna kesh mán bergeni úshin keshirim surady. Hvan Ge An sondaı-aq adamdardan «tezirek qalypty ómirge oralýyn» surady. Ol bılik kózderiniń indet saldarynan shaıqalǵan el ekonomıkasynyń jedel qalpyna keltirilýin kepildeý úshin qoldan keletinniń bárin isteıtinin aıtty.
Dúısenbi kúni elde koronavırýsty juqtyrýy múmkin bolǵan sońǵy patsıent úıdegi karantınnen shyǵaryldy. Eldegi epıdemıologııalyq jaǵdaıdyń kúrdelenýi kezeńinde elde 16,7 myńnan astam adam karantınde bolǵan.
Sońǵy 23 kúnde elde qaýipti indetti juqtyrýdyń jańa jaǵdaılary tirkelgen joq.
Eske sala keteıik, Ońtústik Koreıa aýmaǵynda TShRS-KoV aýyrýdyń birinshi oqıǵasy 20 mamyrda tirkelgen. Vırýsty Taıaý Shyǵys elderine sapar jasap elge oralǵan Koreıa azamaty juqtyrǵany anyqtaldy.
Taıaýshyǵystyq respıratorlyq sındrom (Middle East Respiratory Syndrome, MERS) - Betacoronavirus tekti vırýstyń jańa túri týdyrǵan tynys alý músheleriniń qabynyp aýrýy. Alǵash bul aýrýdy juqtyrý jaǵdaıy 2012 jyly Saýd Arabııasynda tirkeldi.
2012 jyldyń qyrkúıek aıynan bastap álemde bul qaýipti dertti juqtyryp alýdyń 1,3 myńnan astam oqıǵasy tirkelip, sonyń ishinde 460-tan astamy adam ólimimen aıaqtaldy.
