Ońtústik Koreıa dárigerleri Pavlodarda jańa dıagnostıkalyq ortalyq ashady
PAVLODAR. QazAqparat - Ekinshi dıagnostıkalyq ortalyqqa ǵımarat izdeý maqsatynda Pavlodarǵa ońtústikkoreıalyq dárigerler keldi, dep habarlaıdy «QazAqparat» HAA tilshisi.
«Dıagnostıkalyq ortalyq ashylǵan soń bizge tek qazaqstandyqtar ǵana emes, jaqyn shetelden de adamdar keletin bolady. Aýrýdy emdegennen góri, onyń erterek aldyn alǵan ońaıyraq. Bul - jańa dıagnostıkalyq ortalyqtyń basty erejesi bolady»,-dedi Pýsan qalasyndaǵy Dong-A ýnıversıteti janyndaǵy aýrýhananyń dırektory Ho Dje Tak.
Sheteldik mamandar qajetti qurylǵylardyń bárin daıyndap, pavlodarlyq áriptesterin is-tájrıbeden ótýge shaqyryp otyr. Óńir basshysy Bolat Baqaýovpen kezdesý barysynda Ho Dje Tak óziniń aldaǵy maqsattary men josparlary týraly aıtty. Bul týraly oblys ákiminiń baspasóz qyzmeti habarlady. 
«Qonaqtar Pavlodarǵa birneshe kúnge keldi. Olar jańa ortalyqqa yńǵaıly ǵımarat izdeýde. Birneshe aýrýhanany qarap kórgen sheteldik mamandar burynǵy Pavlodar aýdandyq emhanasyna toqtady. Qazir taraptar ǵımaratty satyp alý quqyǵy berilmeı usynatyn nusqaǵa kelisip jatyr», dep habarlaıdy oblys ákiminiń baspasóz qyzmeti.
Baspasóz qyzmetiniń aqparatyna súıensek, jańa ortalyqqa ornatylatyn medıtsınalyq qurylǵylar men aspaptardyń quny 90 mln teńgeden asyp jyǵylady eken. Qabyldaıtyn tarap ol úshin aqsha tólemeıdi. Tek quraldardy jetkizý jáne kedendik jeńildikter jaǵyna kómektesse bolǵany.
«Bul zamanaýı rentgen-qurylǵy, ýltradybys arqyly dıagnostıka jasaý júıesi, mıdaǵy qan aınalymyn ólsheıtin aspap, júrek-ókpe reanımatsııasynyń jáne patsıentterge arnalǵan monıtorlar men basqa da medıtsınalyq qural-jabdyqtar. Qazir qajetti qurylǵylardyń barlyǵy býylyp-túıilip Qazaqstanǵa kez-kelgen ýaqytta jetkizilýge daıyn tur. Endi kadr máselesin sheshýimiz kerek. Sol úshin pavlodarlyq áriptesterdi elimizge shaqyryp otyrmyz»,-dedi Ho Dje Tak.
Bolat Baqaýov sheteldik dárigerlerge qural-jabdyqtardy Pavlodarǵa jetkizý úshin barynsha kómek kórsetýge ýáde berdi.
