Ońtústik Koreıa dárigerleri Astanada sheberlik dáristerin ótkizip jatyr
ASTANA. QazAqparat - Elordanyń №1 aýrýhanasynda Tegý qalasy Fatıma aýrýhanasynyń mamandarynan quralǵan arnaıy delegatsııa sheberlik dáristerin ótkizip jatyr. Sheberlik dáristeri Astana qalasynyń Densaýlyq saqtaý basqarmasy men Tegý (Ońtústik Koreıa) qalasynyń merııasy arasyndaǵy yntymaqtastyq týraly memorandým aıasynda uıymdastyryldy, dep jazady elorda ákimdiginiń resmı saıty.
Jyl saıyn Astana qalasy Densaýlyq saqtaý basqarmasynyń oqý-klınıkalyq ortalyǵynda shet elderdiń eń bilikti dárigerleri men mamandarynyń qatysýymen osy saladaǵy basym baǵyttar boıynsha sheberlik dárister ótkiziledi. Atap aıtqanda, anestezıologııa-reanımatologııa, travmatologııa, ortopedııa, onkologııa, koloproktologııa, balalar nefrologııasy jáne t.b. Sonymen qatar, Seýl ulttyq ýnıversıtetimen, Ońtústik Koreıanyń KHIDI, Woman Medical Park jáne basqa da aldyńǵy qatarly medıtsınalyq ortalyqtarmen memorandýmdar jasaldy.
Koreıalyq mamandardyń qatysýymen ótetin osyndaı sharalardyń basty maqsaty - elordalyq densaýlyq saqtaý júıesin zertteý, sondaı-aq, Oqý-klınıkalyq ortalyq, Astana qalasynyń №1 aýrýhanasy jáne Tegý qalasy Fatıma aýrýhanasynyń arasynda ózara yntymaqtastyq týraly memorandýmǵa qol qoıý bolyp tabylady.
Búgin qalalyq №1 aýrýhana bazasynda «Koloproktologııa» jáne «Ortopedııalyq hırýrgııa» taqyryptary boıynsha semınarlar ótti. Erteń sheteldik densaýlyq saqtaý mamandary qalalyq onkologııalyq dıspanser jáne Oqytý-klınıkalyq ortalyqtyń jumystarymen tanysady dep kútilýde.
