Ońtústik Koreıa bolashaqtyń sýperqalasyn salmaq
ASTANA. 12 qarasha. QazAqparat - Bolashaqtyń sýperqalasy Ońtústik Koreıadaǵy Inchhon portty qalada salynbaq. Ony jasaýshylar álemdegi eń iri týrıstik jobany júzege asyrýǵa nıettenip, Las-Vegas pen Makaony shań qaptyrmaq, dep habarlady Lenta.rý.
Onyń quny 300 mlrd. dollarǵa jýyq qarjyny quraıdy. Ázirge jobanyń sharty ataýy - 8City. «Týrızm qalasynyń» aýmaǵy 80 sharshy shaqyrymǵa jýyqtaıtyn bolady. Salystyratyn bolmaq, qytaılyq Makaonyń aýmaǵy - 28 sharshy shaqyrym. Jobany jergilikti jáne sheteldik ınvestorlar qarjylandyrady. Olardyń birqatarynyń ataýy da belgili boldy - «lıýks» qonaqúıler operatory Kempinski AG, Korean Air Lines Co avıakompanııasy jáne Daewoo Engineering & Construction Co qurylys kompanııasy.
Oıyn-saýyq astanasynyń qurylysy 2013 jyly bastalmaq. 2030 jylǵa deıin saýda ortalyqtary, oıynhanalar, qonaqúıler, ıahta turaqtary, «Formýla 1» úshin jarys joly, akvapark, 50 myń oryndyq kontsert zaly jáne basqa da oıyn-saýyq oryndary men týrısterdiń demalatyn nysandary salynatyn bolady.
Jobalanǵan oıyn-saýyq keshenderi ony Ońtústik Koreıanyń ǵana emes, Qytaı men Japonııanyń da, al bara-bara búkil álemniń týrızm astanasyna aınaldyrmaq. Ásirese, Qytaı týrısterin tartýǵa kúsh salynatyn bolady, joba ataýyna 8 sanynyń qosylýy da beker emes, qytaılardyń yrymy boıynsha bul san sáttilik ákeletin kórinedi. Oıynhana-qalasy segizdik túrinde salynbaq.
Bastapqy kezde jylyna 130 mln.týrıst tartý josparlanýda. Bul órshil ıdeıanyń qalaı júzege asatynyn ýaqyt kórsetedi.
