Ońtústik Koreıa atom energetıkasynan kezeń-kezeńimen bas tartpaq
ASTANA. QazAqparat - Ońtústik Koreıa atom energetıkasynan kezeń-kezeńimen bas tartýdy josparlap otyr. Memleket basshylyǵynyń energetıkalyq strategııasyna sáıkes, 2038 jylǵa qaraı alty jańa reaktordy joıý jáne eskirip bara jatqan 14 reaktordy birtindep jabý kózdelip otyr. Aldaǵy taıaý ýaqytta tozyǵy jetken taǵy bir qurylǵynyń jumysy toqtatylatyn bolady, dep habarlaıdy QazAqparat Nikkei Asian Review ınternet-basylymyna silteme jasap.
Ońtústik Koreıa 2030 jylǵa qaraı búkil energetıka júıesindegi taza energııa kózderiniń úlesin 20 protsentke jetkizýdi josparlap otyr.
Eldegi memlekettik 6 elektr stansasy 2035 jylǵa deıin qalpyna keletin energııa kózderin damytýǵa jalpy 45 trıllıon von (39,9 mlrd AQSh dollary) kóleminde qarjy jumsamaq. Koreıa Ulttyq Assambleıasynyń Saýda, ónerkásip jáne energetıka komıtetiniń josparyna sáıkes, 2017 jyldyń ózinde kún jáne jelden alynatyn energııa mólsherin 33 gVt-qa jetkizý josparlanǵan.
Bul - qalpyna keletin energııa kózderiniń qazirgi jıyntyq qýatynan eki ese artyq degen sóz. Máselen, Korea Electric Power Corp. kompanııalar tobyna kiretin Korea South-East Power qalpyna keletin energııa óndirý qýatyn 5,7 gVt-qa arttyryp, bul maqsatqa 6 mlrd AQSh dollary shamasynda qarjy quıýdy josparlap otyr. Taza energııanyń úlesin 20% jetkizý úshin qazir óndirilip jatqan energııaǵa taǵy 45 gVt taza energııa qosý qajet.
