Ońtústik Koreıa astanasynyń meri óli kúıinde tabyldy
SEÝL. VVS – QazAqparat – Beısenbi kúni polıtsııa Ońtústik Koreıanyń astanasy Seýl meriniń denesin tapty. Aldyn ala málimet boıynsha, ol óz-ózine qol salǵan, dep habarlaıdy QazAqparat VVS agenttigine silteme jasap.
64 jastaǵy Pak Von Sýnnyń joǵalyp ketkeni týraly beısenbi kúni keshke merdiń qyzy habarlaǵan.
Onyń aıtýynsha, ákesi úıinen shyǵyp ketip, oralmaǵan. Ol qyzyna hat ta qaldyryp ketken. Ony kórgennen keıin birden polıtsııa shaqyrǵan.
Qala ákimshiliginen Associated Press agenttigine habarlaǵandaı, Pak Von Sýn beısenbi kúni jumysqa kelmegen. Osyǵan baılanysty onyń qatysýy tıis bolǵan barlyq jınalystar men is-sharalar keıinge qaldyrylǵan.
Baqylaý kamerasyna merdiń saǵat 10:53-te Sonbýk-gý aýdanyndaǵy ormanǵa ketip bara jatqany túsip qalǵan. Sol jerden sońǵy ret uıaly telefonynyń sıgnaly tirkelgen.
Merdi izdeý jumystaryna 600-ge jýyq polıtseı men órt sóndirýshi qatysty. Operatsııaǵa drondar men iz kesýshi ıtter de tartyldy.
Eske sala keteıik, Pak Von Sýn 2011 jyly Seýl basshysy bolyp saılandy. Ótken jyldyń shildesinde ol úshinshi ret mer bolyp saılandy jáne zańǵa sáıkes, bul atalǵan laýazymdaǵy sońǵy merzimi edi.
Bilimi boıynsha - zańger. 1982 jyldan bastap advokattyq qyzmetpen aınalysty jáne adam quqyqtary boıynsha mamandandy.
1970 jyldardyń sońynda ol Pak Chýn Hı dıktatýrasyna qarsy stýdenttik narazylyqtarǵa qatysqany úshin Seýl ulttyq ýnıversıtetinen shyǵaryldy. Oqýdan shyqqannan keıin ol birneshe aı túrmede bolǵan.
1993 jyly Garvard ýnıversıtetiniń zań fakýltetinde ǵylymı qyzmetker bolyp jumys istedi.
Seýl meri qyzmetinde bolǵan kezde Pak Von Sýn qalany kórkeıtýmen belsendi túrde aınalysqan.
2013 jyly ol Seýl metrosynda jáne qala mańyndaǵy poıyzdarda jol júrý aqysyn kóterýdi toqtatqan bolatyn.
