Ońtústik Qazaqstannyń týroperatorlary úsh memleketpen kelisimshart jasasty
ShYMKENT. QazAqparat - Ońtústik Qazaqstan oblysynyń týrızm salasyndaǵy bıznes ókilderi men sheteldik týroperatorlar bas qosqan dóńgelek ústel ótti.
Aldaǵy jumys josparlar jaıy talqylanǵan jıyn nátıjesinde, Qytaı, Qyrǵyzstan jáne Ózbekstannan kelgen mamandar men óńirdiń bıznes ókilderi ózara yntymaqtastyqty arttyrý aıasynda 10 kelisimshartqa qol qoıdy, dep habarlaıdy QazAqparat HAA tilshisi.
Atalǵan qujattar negizinde, taraptar týrızmdi ózara tıimdi damytýǵa, kerekti aqparattar men tájirıbe almasýǵa, birigip ishki týrızmdi damytýǵa baǵyttalǵan is-sharalar uıymdastyrýǵa mindetteledi.
Eske salsaq, 25-29 sáýir aralyǵynda Ońtústik Qazaqstan oblysynyń týrıstik múmkinshilikterin halyqaralyq naryqta arttyrý maqsatynda aqparattyq týr ótken-di. Qytaı (3 týroperator), Qyrǵyzstan (5) jáne Ózbekstannan (10) kelgen týroperatorlar bes kún ishinde Ońtústik Qazaqstan oblysynyń tarıhı-mádenı, emdeý-ońaltý, ekologııalyq - basty 3 baǵytymen tanysty. Onda qonaqtar Túrkistan shahary men Otyrar aýdanyndaǵy tarıhı oryndarǵa, Saryaǵashtaǵy saýyqtyrý ortalyqtaryna, «Saıram-Ógem» memlekettik ulttyq tabıǵı parkindegi demalys aımaqtaryna jáne Shymkenttegi qonaqúılerge baryp, aralady.
Aımaqtyń san qyrly tabıǵatyna qanyqqan sheteldik qonaqtar kúngeıdiń tamasha tabıǵatyna súısinip, oblys ortalyǵy - Shymkenttiń ásem sáýletimen tanysty.
