Ońtústik Qazaqstannyń ónerpazdary Túrkııada óner kórsetýde

ShYMKENT. QazAqparat - Elbasynyń «Bolashaqqa baǵdar: rýhanı jańǵyrý» maqalasy men Qazaqstan men Túrkııa arasyndaǵy dıplomatııalyq qarym-qatynastardyń 25 jyldyǵy aıasynda Túrkııa memleketine Ońtústik Qazaqstan oblysynyń óner maıtalmandary attandy.

Basty maqsat qos el arasyndaǵy qarym-qatynasty nyǵaıtý men ortaq mádenıetti qalyptastyra otyryp, ádebı, rýhanı qundylyqtardy dáripteý, dep habarlaıdy QazAqparat HAA tilshisi.  

XVIII «Halyqaralyq Ramazan» festıvali aıasynda  Túrkııanyń bas qalasy Ankaranyń Kechıóren aýdanynda jyr alyby Jambyl Jabaev atyndaǵy kósheniń saltanatty ashylý rásimi jáne «Qazaqstan keshi» kontserti ótti. Memleketaralyq mańyzdy sharaǵa Ońtústik Qazaqstan oblysynan 42 delegat attandy. Olardyń qatarynda QR Eńbek sińirgen qaıratkeri, Shámshi Qaldaıaqov atyndaǵy oblystyq fılarmonııa ártisi Sabırash Ábdiraıymova, QR Mádenıet qaıratkeri, ánshi Abylaıhan Ospanov, QR Mádenıet qaıratkeri, oblystyq opera jáne balet teatrynyń solısti Marat Orazmetov, QR Mádenıet qaıratkeri, oblystyq opera jáne balet teatrynyń solısti Úralhan Seılibekova, QR Mádenıet qaıratkeri,  «Qazyna» bı ansambliniń kórkemdik jetekshici Záýre Ájibekova syndy kóptegen mádenıet maıtalmandary bar.

Túrkııadaǵy Qazaqstan keshinde  dástúrli ánder men qazaq-túrik ánderinen popýrrıler oryndalsa,  «Qazyna» bı ansambli elimiz mədenıetin bı ónerimen pash etti. «Tumar» folklorlyq ansambliniń sazdy óneri de qos eldiń mereke dýmanyn asqaqtatty.

Arnaıy attanǵan óner delegattary Túrkııa memleketiniń Ankara, Adana, Mersın, Ystanbul qalalarynda kontserttik baǵdarlama usynady dep kútilýde.