Ońtústik Qazaqstannyń qutqarýshylary shyǵys óńirge kómekke jiberildi
ASTANA. QazAqparat - Shyǵys Qazaqstan oblysyn sý basýyna baılanysty Ońtústik Qazaqstannyń qutqarýshylary shyǵys óńirge kómekke jiberildi, dep habarlaıdy QazAqparat.
«QR ІІM Tótenshe jaǵdaılar komıtetiniń tóraǵasy general-maıor V.Bekkerdiń tapsyrmasyna sáıkes, apattyq-qutqarý jáne basqa kezek kúttirmeıtin jumystardy jedel júrgizý úshin «OQO TJD jedel-qutqarý jasaǵy (Shymkent q.» MM-nyń jeke quramynda 10 adam jáne OQO TJD «Órt sóndirý jáne avarııalyq-qutqarý jumystary qyzmeti» MM-nyń jeke quramynda 16 adam, 30 motopompa) búgin mejeli jerge Shymkent qalasynyń áýejaıynan ushty», dep habarlaıdy OQO TJD memlekettik til jáne aqparat toby.
Málimet boıynsha, Ońtústik Qazaqstan oblysy Tótenshe jaǵdaılar departamentiniń bastyǵy azamattyq qorǵaý polkovnıgi N.Derbısov jedel toptardy qalyptastyrýǵa tikeleı basshylyq jasap, avarııalyq-qutqarý jumystaryn júrgizý kezinde qaýipsizdik tehnıkasyn saqtaý boıynsha árbir qutqarýshymen jeke nusqaý ótkizdi.
«Kúnniń kúrt jylynýyna jáne qar sýynyń qalyptasýyna baılanysty Glýbokovskoe aýdanynda onshaqty turǵyn úı men aýla ýchaskelerin sý basqan. Sondaı-aq, Shemonaıha aýdanynda Ýba ózeninde muzdyń erte júrýine baılanysty keptelis paıda boldy. Aýdandyq azamattyq qorǵaý qyzmetiniń barlyq kúsh jáne quraldary kúsheıtilgen rejımde jumys atqarýda. Shyǵys Qzaqstan oblysynyń osy eki aýdanynda jergilikti kólemdegi tótenshe jaǵdaı jarııalanyp qoıǵan» delingen habarlamada.
Sondaı-aq, elimizdiń shyǵys óńirine kómek kórsetý úshin jáne kóktemgi mezgildegi TJ-ǵa tıimdi tótep berý úshin basqa aımaqtardan qosymsha kúsh jumyldyrý týraly basshylyq tarapynan sheshim qabyldanǵan.
