Ońtústik Qazaqstannyń eki turǵyny 7,5 keli geroınmen ustaldy
ShYMKENT. QazAqparat - Ońtústik Qazaqstan oblysynda 7,5 keli geroın satpaq bolǵan eki kúdikti ustaldy.
Óńirdiń tártip saqshylary iri kólemde esirtkini saýdalaǵan Qazyǵurt aýdanynyń turǵyndaryn Shymkent-Tashkent tasjoly boıynda qolǵa túsirdi, dep habarlaıdy QazAqparat HAA tilshisi.
Seziktilerdiń asa iri kólemde esirtki satatyndaryn óńirdiń tártip saqshylary aldyn ala bilgen. Oblystyq ІІD Esirtki bıznesine qarsy kúres basqarmasynyń qyzmetkerleri jedel-izdestirý is-sharasy barysynda 1969 jáne 1970 jyldary týǵan eki kúdiktini ustady. Ekeýi de Qazyǵurt aýdanynyń turǵyndary bolyp shyqty. Avtokólik salonyn tintý kezinde 7 plastmass ydysqa salynǵan geroınge uqsas esirtki zaty tárkilendi. Sot-krımınaldyq saraptamasynyń qorytyndysyna sáıkes, tárkilengen zattyń jalpy salmaǵy 7,5 kelini quraıtyn geroın ekeni anyqtaldy.
Qazirgi tańda osy jaıt boıynsha QR QK 297-babymen («Esirtki, psıhotroptyq zattardy, sol tektesterdi ótkizý maqsatynda zańsyz daıyndaý, qaıta óńdeý, ıemdený, saqtaý, tasymaldaý, jóneltý ne ótkizý») qylmystyq is qozǵaldy. Kúdiktiler qamaýǵa alynyp, sotqa deıingi tergeý amaldary júrgizilip jatyr.
Polıtseıler sondaı-aq esirtki zatynyń Ońtústik Qazaqstan oblysyna qandaı jolmen kelgenin, kimge jetkizilýi tıis bolǵanyn anyqtaý maqsatynda jedel sharalar júrgizýde.
