Ońtústik Qazaqstannyń 128 mektebinde robot tehnıkasy synyptary paıda bolady
Negizinen munda oblystyń áleýmettik, ekonomıkalyq mańyzdy salalaryna qajetti qarjy bólindi. Atap aıtsaq, oblys aýmaǵynda tótenshe jaǵdaılardyń aldyn alý jáne joıý jumystaryn júrgizý úshin 389,4 mln. teńge, aımaqtaǵy 128 mektepti robot tehnıkasy kabınetimen jaraqtandyrýǵa 748,2 mln. teńge qarastyrylyp otyr. Búgin bul týraly Ońtústik Qazaqstan oblystyq máslıhatynyń kezekti on úshinshi sessııasynda Ońtústik Qazaqstan oblysynyń ákimi Janseıit Túımebaev málim etti.
Qaıta naqtylanǵan bıýdjettiń eń kóp sommasy, ıaǵnı 1,5 mlrd teńgesi «Bıznestiń jol kartasy - 2020» baǵdarlamasy aıasynda kásipkerlikti qoldaý maqsatyna bólindi. Bul qarjy banktegi nesıelerdiń paıyzdyq stavkalaryn sýbsıdııalaý úshin qosymsha qaralyp otyr. Bıylǵy jyly atalǵan maqsatqa 3 mlrd teńge bólingen bolatyn, endi oǵan 1,5 mlrd. teńge qosylyp, jalpy 4,5 mlrd. teńgeni qurady. Bul degenimiz bankterden shamamen 37 mlrd. teńgege jýyq ınvestıtsııa tartýǵa jol ashady, ıaǵnı kásipkerlerge osy somaǵa nesıe alýǵa múmkindik bar.
«Ózderińizge belgili, Elbasymyz Nursultan Ábishuly Nazarbaev bizge óńirdi damytý boıynsha naqty tapsyrmalar bergen bolatyn. Biz barlyǵymyz sol tapsyrmalardy oryndaýǵa mindettimiz. Sondyqtan da kásipkerlikti jáne áleýmettik salalardy damytýǵa barlyq múmkindikter jasalynyp otyr. Al, Shymkenttegi 4 úıdiń qurylysyn jalǵastyrýǵa 554,3 mln. teńge qarastyrdyq. 4 aýyz sý jáne 2 káriz nysandarynyń qurylysyna 495 mln. teńge bólinip otyr. Budan bólek, Shymkent qalasyndaǵy Bozaryq 1,2,3 turǵyn úı alabyn elektrmen qamtamasyz etý qurylysyn jalǵastyrýǵa 200 mln. teńge jumsaıtyn bolamyz», - dedi J. Túımebaev.
Bıyl Túrkistan jáne Kentaý qalalaryndaǵy turǵyn úılerdi jańǵyrtýǵa 491,5 mln.teńge baǵyttalsa, Shymkent qalasyndaǵy burynǵy qoqys polıgonynyń aýmaǵynda saıabaq salý jáne kóshelerdi jaryqtandyrý jumystaryn júrgizý úshin 400,7 mln. teńge josparlanýda.
Budan bólek, 6 bilim berý nysanynyń qurylysyn bastaýǵa 55 mln.teńge bólinedi. Al mindetti áleýmettik medıtsınalyq saqtandyrý júıesin engizge jáne ortalyqtandyrylǵan aqparattyq júıesine kóshý baǵytynda densaýlyq saqtaý salasynyń medıtsınalyq uıymdaryna 1 732 dana kompıýter satyp alýǵa 346,4 mln. teńge qarastyrylyp otyr. Densaýlyq saqtaý salasyn damytýǵa jalpy 4 emhananyń qurylysyna jáne 2 jobanyń jobalaý-smetalyq qujattamasyna 97 mln. teńge baǵyttalatyn bolady.
Sessııa barysynda oblystyq mańyzy bar eki avtomobıl jolynyń qurylysyn bastaý jáne Astana dańǵylynyń qurylysyn jalǵastyrý úshin 224,4 mln. teńge qarastyryldy.