Ońtústik Qazaqstandaǵy órt: Úsh bala mert boldy
ShYMKENT. QazAqparat - Ońtústik Qazaqstan oblysynda turǵyn úıden órt shyǵyp, úsh bala kóz jumdy. Taǵy bir adam zardap shekken, dep habarlaıdy QazAqparat tilshisi.
Qaıǵyly oqıǵa Sozaq aýdanynyń ortalyǵy Sholaqqorǵan aýylynda bolǵan.
Oblystyq TJD baspasóz qyzmetiniń málimetinshe, túngi saǵat úshter shamasynda jańadan salynǵan turǵyn úıden órt shyqqan. Bul ýaqytta analary taǵy eki kishkentaı balalaryn alyp, qalaǵa qydyryp ketken eken. Pesh turǵan bólmeden shyqqan jalyn jan-jaqqa tarap, kórshi bólmedegi balalar tútinge tunshyqqan. Tilsiz jaýdy aýyzdyqtaýǵa aýdandyq órt sóndirý qyzmetiniń 11 qyzmetkeri men 3 birlik tehnıka jumyldyrylǵan. Jalyn shamamen 03.48-de tolyǵymen sóndirilip, bitken. Alaıda órt saldarynan 6, 11 jáne 12 jastaǵy úsh balany kúıik shalyp, oqıǵa ornynda kóz jumdy. Al, 35 jastaǵy ákesiniń denesin 18 paıyz kúıik shalyp, aýdandyq aýrýhanaǵa jatqyzylǵan. Jalyn sharpyǵan aýmaq 250 sharshy metrdi qurady.
Qazir osy oqıǵa boıynsha tıisti sot-medıtsınalyq jáne basqa da saraptamalar taǵaıyndalyp, órttiń neden shyqqany anyqtalyp jatyr.
