Ońtústik Qazaqstandaǵy asýlarda jolaýshylar qutqaryldy
ShYMKENT. QazAqparat - Ońtústik Qazaqstan oblysyndaǵy asýlarda jolaýshylar qutqaryldy. Sońǵy úsh kúnde oblystyq tótenshe jaǵdaılar departamentiniń qyzmetkerleri Báıdibek aýdanyndaǵy Shybyqbel asýynan 28 adamdy qar qursaýynan alyp shyqty, -dep habarlaıdy QazAqparat HAA tilshisi.
Oblystyq tótenshe jaǵdaılar departamentiniń bas mamany Zarıpa Turysbekovanyń sózinshe, asýdaǵy qutqarylǵan jolaýshylardyń arasynda bir aılyq sábı de bolǵan. Oblys turǵyndarynyń tıisti eskertýlerge nemquraıly qaraýy osyndaı jaǵdaılarǵa tap boldyrýda eken.
«Qutqarý sharalaryna tótenshe jaǵdaılar qyzmetinen bólek jolǵa jaýapty mamandar da jumyldyryldy. Osy mekemeniń arnaıy úsh tehnıkasy jolda turyp qalǵan alty kólikti alyp shyqty. 22 jolaýshy qaýipsiz jerge jetkizilip, alǵashy kómekter berildi»,-deıdi Z. Turysbekova.
Óńirdegi jol júrýge qaýipti aýmaqtardyń qatarynda sondaı-aq Sozaq aýdanyndaǵy Odaman bulaq pen Taskómirsaı asýlary da bar. Kúni búgin bul asýlardaǵy jol jabylǵan. Al, Túlkibas aýdanyndaǵy Shaqpaq baba asýynda jyl saıyn júzdegen jolaýshy men kólikter turyp qalady. Jyl basynan beri óńirdiń qutqarýshylary qar qursaýynan shyǵa almaı qalǵan 60 tan asa adamǵa qolushyn sozdy.
