Ońtústik Qazaqstanda joǵalǵan qyzdy jaldamaly páterde kúshtep ustaǵan
ShYMKENT. QazAqparat - Ońtústik Qazaqstan oblysynda eki aptadan beri izdeýde júrgen jasóspirim tabyldy.
15 jastaǵy qyzdy bazbireýler jaldamaly páterde ustap kelipti, dep habarlaıdy QazAqparat HAA tilshisi
Oblystyq ІІD baspasóz qyzmetiniń jetekshisi Saltanat Qarakózovanyń sózinshe, kámelet jasyna tolmaǵan qyz belgisiz tulǵalarmen áleýmettik jeli arqyly tanysqan. Jumys taýyp beremiz degen ýádemen ony qalaǵa shaqyrǵan. Búǵan sengen 15 jastaǵy qyz 22 sáýir kúni Shymkent qalasyna jetipti. Qalaǵa kirgen boıda ony kútip alǵan. Sodan keıin jasóspirim týraly eshbir habar bolmaǵan.
Osydan keıin qyzdyń ata-anasy perzentteriniń joǵalǵanyn aıtyp, polıtsııaǵa aryzdanypty. Sol ýaqyttan beri tártip saqshylary izdeý sharalaryn júrgizdi. Shymkent qalalyq Ál-Farabı polıtsııa bóliminiń qyzmetkerleri jasóspirimdi jaldamaly páterlerdiń birinen taýyp aldy. Belgili bolǵandaı, 1997 jyly týǵan qyz ben jigit ony sol jerde kúshtep ustap kelgen. Qazirgi tańda olarǵa qatysty Qylmystyq kodekstiń 126-baby (Bas bostandyǵynan zańsyz aıyrý) boıynsha is qozǵalyp, tergeý amaldary júrgizilýde.
Tártip saqshylary olardyń qylmys jasaǵanyn tolyqqandy tekseretin bolady.
