Ońtústik Qazaqstanda jańa transformator zaýyty salynady

ASTANA. QazAqparat - Ońtústik Qazaqstan oblysynda qýattylyǵy 110-120 kVt bolatyn joǵary kerneýli transformator shyǵarý qolǵa alynýda. 2016 jyldan bastap salyna bastaǵan nysandy iske qosý jumystary 2018 jyldyń ekinshi toqsanyna josparlanǵan, dep habarlaıdy QazAqparat oblys ákimdigine silteme jasap.

«Tassaı» ındýstrıaldy aımaǵynda ornalasqan qurylys jobasynyń barysymen Ońtústik Qazaqstan oblysynyń ákimi Janseıit Túımebaev arnaıy tanysyp,  atqarylyp jatqan jumystarǵa oń baǵasyn berdi.

 «Aldaǵy jyly zaýyt iske qosylsa, 220 adamdy jumyspen qamtýǵa múmkindik týady. Bul óte jaqsy dúnıe. Eń bastysy - qazirgi tańda kásiporynda atqarylyp jatqan jumystarǵa oń baǵa berýge bolady. Sondyqtan jumysty josparly túrde júrgizip, zaýytty erterek iske qosýǵa mán bergen jón»,- dedi J. Túımebaev.   

Aıta keteıik, kásiporyn kásipkerlikti qoldaý kartasynyń aıasynda júzege asyrylýda. Al joba quny 17,5 mlrd. teńgeni quraıdy. Zaýyt jylyna  120 transformator shyǵarýǵa qaýqarly.

Zaýyt ónimderi Qazaqstan men TMD elderiniń suranasyn  qanaǵattandyrady dep kútilýde.  «Óndiriletin ónim sheteldik kásiporyndarǵa shynaıy básekelestikke tótep bere alady»,- deıdi mamandar. Sonymen qatar «Asia Trafo» JShS óz ónimderiniń 50 paıyzyn TMD elderine eksporttaýdy josparlap otyr. Zaýytta «High volt», «Knutch» (Germanııa), «Tuboly astronic», «Mika fluit» (Shveıtsarııa), «Hikon» (Horvatııa) jáne basqa (Túrkııa, Qytaı) fırmalarynyń jabdyqtaryn qoldanatyn bolady.