Ońtústik Qazaqstanda Táýelsizdik jyldary jumyssyzdyq deńgeıi 3 esege tómendegen

ShYMKENT. QazAqparat - Ońtústik Qazaqstan oblysynda Táýelsizdik jyldary jumyssyzdyq deńgeıi 3 esege deıin tómendegen. Bul týraly oblystyq Jumyspen qamtýdy úılestirý jáne áleýmettik baǵdarlamalar basqarmasy basshysynyń orynbasary Sátjan Polatov OQO Aımaqtyq kommýnıkatsııalar qyzmetinde ótken baspasóz máslıhatynda habarlady.

Ol Táýelsizdik jyldarynda oblys halqy 50%-ǵa ósip, 2,8 mln. adamdy quraǵanyn, sáıkesinshe, jumyspen qamtylǵan halyqtyń sany 60%-dan astamǵa ósip,  jumyssyz halyqtyń sany úsh esege jýyq azaıǵanyn jetkizdi. Naqtyraq aıtqanda, oblystaǵy statıstıkalyq esep boıynsha 2000 jyly jumyssyzdyq deńgeıi 14,3 paıyzdy qurap, 2016 jyly 5,1 paıyzǵa (2016 j. ІІІ toqsan qorytyndysy) tómendegen. Al osy merzim ishinde az qamtylǵan otbasylarǵa áleýmettik kómek retinde 42,8 mlrd. teńgeden astam qarjy bólinipti.  

«Táýelsizdiktiń 25 jylynda jumyspen qamtylǵan halyqtyń sany artyp, jumyssyzdardyń sany jáne jumyssyzdyq deńgeıi  tómendeýi baıqalyp otyr. Onyń dáleli 2009 jylǵy jumyssyzdardyń sany 75 myń adamnan búgingi kúnge 62,1 myń adamǵa, jumyssyzdyq deńgeıi 6,6 paıyzdan, 5,1 paıyzǵa, jastar arasyndaǵy jumyssyzdyq deńgeıi 8,1 paıyzdan 3,5 paıyzǵa deıin tómendedi», - dedi S.Polatov.

Egemendik toıy qarsańynda, jyl basynan beri oblysta 46480 jańa jumys oryndary ashylǵanyn baıandaǵan Sátjan Muhtaruly aldaǵy ýaqyttarda memlekettik jáne salalyq baǵdarlamalar negizinde taǵy da 51220 jańa jumys oryndary ashylatyny josparlanyp (onyń ishinde 4687 oryn «Nurly jol», 2404 oryn «ÚIID» baǵdarlamasy sheńberinde, 12031 oryn memlekettik salalyq, 2330 oryn «Bıznestiń jol kartasy 2020 jol kartasy», 1266 oryn «Agrobıznes 2020» sheńberinde, 6351 oryn «Jumyspen qamtý 2020 jol kartasy», 22152 oryn "Óńirlerdi damytý" memlekettik baǵdarlamalary aıasynda) jatqanyn jetkizdi. Sondaı-aq, jergilikti jumyssyz azamattardy jumyspen qamtý maqsatynda 11392 adamdy jumyspen qamtý organdary arqyly jumysqa ornalasatyny kózdelgenin de atap ótti.

Saladaǵy eleýli jetistikterdiń biri «Jumyspen qamtý 2020 jol kartasy» baǵdarlamasynyń júzege asyrylýy ekenin aıtqan spıker atalǵan baǵdarlamanyń arqasynda kóptegen azamattardyń jumyspen qamtý nátıjesinde olardyń tabysy artyp, ál-aýqatynyń jaqsaryp jatqanyn qýantarlyqtaı jaǵdaı ekenin jetkizdi. 

Memleket basshysynyń tapsyrmasy boıynsha 2011 jyldan bastap ınfraqurylymdyq jobalardy iske asyrý arqyly jańa jumys oryndaryn qurý, kásipkerlikti damytý, kásiptik daıarlaý jáne jumyspen qamtýǵa járdemdesýge baǵyttalǵan «Jol kartasy 2020» baǵdarlamasy júzege asyrýda 6,2 myń adamǵa shaǵyn nesıe berilse, 20,3 myń adam kásibı oqýǵa joldanyp, mamandyq alýyna, 216,1 myń adamnyń turaqty jumysqa ornalasyp, tabysyn arttyrýyna múmkindikter týǵan, dep habarlaıdy óńir basshysynyń baspasóz qyzmeti.