Ońtústik Qazaqstanda suıytylǵan gaz baǵasy arzandady

ASTANA. QazAqparat - Ońtústik Qazaqstan oblysynda suıytylǵan gaz baǵasy arzandady. Sondaı-aq óńirge bólinetin suıytylǵan munaı gazynyń kólemi 11 500 tonnaǵa deıin ulǵaıtyldy. Buǵan Ońtústik Qazaqstan oblysy ákimdigi ýákiletti organmen birlesip júrgizgen jumystardyń arqasynda qol jetizilip otyr, dep habarlaıdy QazAqparat aımaq basshysynyń baspasóz qyzmetine silteme jasap.

Búginde oblystyń gaz quıý beketterinde kógildir otyn 2017 jyldyń basyndaǵy jaǵdaımen salystyrǵanda 7 teńgege arzandap, 59-60 teńgeni qurady.

Aıta keteıik,ótken jyldyń salystyrmaly kezeńinde Energetıka mınıstrligi tarapynan Ońtústik Qazaqstan oblysyna 4000 tonna kóleminde suıytylǵan munaı gazy bólingen. Bul oblystyń suranysyn tolyq qamtamasyz etpeı, suıytylǵan gaz baǵasynyń edáýir joǵary deńgeıde qalyptasýyna alyp kelgen bolatyn.

Eske salaıyq,  QR 2012 jylǵy 9 qańtardaǵy «Gaz jáne gazben jabdyqtaý týraly» zańymen respýblıkada gaz jáne gazben jabdyqtaý salasynda memlekettik retteý engizilgen. Atalǵan zańǵa sáıkes, Qazaqstan Respýblıkasynyń ishki naryǵynyń suıytylǵan munaı gazyna qajettilikterin qanaǵattandyrý maqsatynda QR Energetıka mınıstrligi Úkimet belgilegen tártippen, ishki naryqqa jeńildetilgen baǵadaǵy suıytylǵan munaı gazyn berý josparyn bekitti.

Búginde Ońtústik Qazaqstan oblysynda 27 myńnan astam avtokólik syǵymdalǵan gaz paıdalanady. Al  avtogaz quıý beketteriniń sany 240 birlikke jetip otyr. Bul kórsetkish ótken jylmen salystyrǵanda 2 esege kóbeıgen. Kúnine oblys boıynsha shamamen 20 avtokólikke gaz qondyrǵysy ornatylady.