Ońtústik Qazaqstanda mektep dırektorlary jumysqa jańa erejemen qabyldanatyn bolady

ASTANA. QazAqparat - Ońtústik Qazaqstan oblysynda bilim berý uıymdaryndaǵy tehnıkalyq qyzmetkerlerdiń jumysyn uıymdastyrý jáne mektep dırektorlaryn taǵaıyndaý jumystary jańasha formatta júzege asyrylatyn boldy. Oblys ákimi Janseıit Túımebaevtyń tóraǵalyq etýimen ótken selektorlyq jıynda atalǵan másele jan-jaqty talqylandy, dep habarlaıdy QazAqparat.

Jıynda baıandama jasaǵan oblys ákiminiń orynbasary U.Sádibekov bilim salasynda oryn alǵan birqatar sybaılas jemqorlyq derekterine toqtalyp, onyń aldyn alý joldaryn usyndy.

«2015 jyldan beri sybaılas-jemqorlyq, quqyqbuzýshylyq faktilerine jol bergen bilim salasynyń 55 qyzmetkeri tártiptik, qylmystyq jaýapkershilikke tartylǵan. Osyndaı olqylyqtyń aldyn alý maqsatynda «Tsıfrlyq Qazaqstan» memlekettik baǵdarlamasy qolǵa alynyp otyr. Osyǵan deıin pedagogıkalyq qyzmetke kandıdattar, joǵary oqý oryndarynyń túlekteri, bos jumys oryndaryn izdeý maqsatynda barlyq bilim berý uıymdaryn aralaýǵa májbúr edi. Atalǵan júıe engizilgennen keıin veb-portal arqyly onlaın-ótinishti joldaıdy. Konkýrstyq negizde irikteýden ótip, jumysqa qabyldaýǵa komıssııaǵa usynylady. Bul jumystar qoǵamda oryn alatyn sybaılas jemqorlyq faktileriniń týyndaýyna alyp keledi dep sanaımyz», - dedi Ulasbek Sádibekuly.

Bul júıe Shymkent qalasyndaǵy barlyq mektepke ornatylǵan. Nátıjesinde qaladaǵy bilim uıalarynda - 12, al oblys boıynsha 205 bos jumys orny bar ekeni anyqtalǵan. Degenmen, keıbir aýdandarda atalǵan júıeniń maqsatty jumys isteýi úshin qajetti kabınetter jabdyqtalmaǵan. Sonymen qatar, bul júıeniń jáne kabınettiń jumysyn úılestirý úshin ІT-mamandar birlikteri bólinbegen.
 

Aımaq basshysy aýdan, qala ákimderine atalǵan kemshilikterdi joıýdy tapsyrdy.

Sonymen qatar, mektep dırektorlarynyń oqý-tárbıe jáne pedagogıkalyq ınnovatsııa jumystarymen aınalysýyna tolyq múmkindikter jasaý maqsatynda bilim berý uıymdaryndaǵy tehnıkalyq qyzmetkerlerdiń jumysyn uıymdastyrýdy jáne mektep ǵımarattaryn ustaý qyzmetterin jańa formada uıymdastyrý úshin jergilikti jerlerdegi kommýnaldyq sharýashylyq qyzmetine berý mehanızmin qarastyrý usynysy jasaldy.

 «Biz bilim berý uıymdarynyń basshylaryn taǵaıyndaýdaǵy dástúrli júıeni túbegeıli ózgertip, jańashyldyqqa bet burýdy bastadyq. Ol - zaman talaby. Qazirgi tańda, oblys boıynsha 7 aýdanda 25 mektep dırektory laýazymy qyzmetine bos oryn bolǵanymen saıtqa jarııalanbaı otyr. Olar Arys, Qazyǵurt, Maqtaaral, Otyrar, Saıram, Tólebı, Túlkibas. Sonymen qatar, 2018 jyldyń birinshi toqsanynda Bilim basqarmasyna jeke tulǵalardan 104 aryz-shaǵym kelip tússe, onyń 68-i mektep basshylyǵyna qatysty, 9-y sybaılastyq faktilerine, 12-si eńbek qatynasyna qatysty, qalǵan 15-i ózge de máselelerdi quraǵan. Mine, osy problemalardy boldyrmaý tikeleı jergilikti ákimdiktiń jumysy. Bilim salasyna sandyq tehnologııanyń jetistikterin jáne ózge de jańa zamanǵa júıelerdi engizip, týyndaǵan máselelerdi túbegeıli sheshýdiń jolyn tabý kerek», - dedi Janseıit Qanseıituly.

Jıyndy qorytyndylaǵan aımaq basshysy oblys ákiminiń orynbasary U.Sádibekovke taldaý jumystaryn júrgizýdi jáne kemshilikke jol bergen mamandarǵa tıisti shara qoldanýdy tapsyrdy. Sonymen birge mektep dırektorlaryn rotatsııalaý boıynsha utymdy usynys jasaý qajettiligin aıtty. Sebebi, arnaıy zerdeleý barysynda bir mektepte 15 jyldan joǵary - 36, 20 jyldan joǵary - 19 dırektor qyzmet etetindigi anyqtalǵan.