Ońtústik Qazaqstanda qyz-kelinshekter arasynda jatyr moıny isigi dendep barady
ShYMKENT. QazAqparat - Ońtústik Qazaqstan oblysynda qyz-kelinshekter arasynda jatyr moıny isigi kóptep kezdese bastady.
Búginde osy dıagnozben 300 naýqas arnaıy tirkeýge alynǵan, dep habarlaıdy «QazAqparat» HAA tilshisi.
Ýaqytyly em-dom ǵana bul keseldiń aldyn alatynyn sóz etken dárigerler, osy máselege oraı arnaıy brıfıng ótkizdi. Oblystyq onkologııalyq dıspanserdiń mamandary jatyr moıny isigi ásirese jas qyzdardyń bolashaǵy úshin óte qaýipti ekenin eskertýde.
«Qazirgi tańda qaterli isik aýrýlary «jasaryp» otyr. Buryndary ol 40-50 jastaǵy áıelderde kezdesse, qazir 22-25 jastaǵy qyz-kelinshekterde anyqtalýda. Kez kelgen isik birden ulǵaımaıdy. Sondyqtan, aýrýdyń birinshi, ekinshi satysynda 100 paıyz aıyǵýǵa bolady. Buǵan qazirgi medıtsınanyń pármeni jetedi», - deıdi oblystyq onkologııalyq dıspanseri konsýltatıvtik emhanasynyń meńgerýshisi Bolat Dáýrenov.
Búginde óńirde qaterli isikti qozdyratyn papılloma vırýsyna qarsy vaktsına egý bastalǵan. Ekpe 10-45 jas aralyǵyndaǵy qyz-kelinshekterge jasalady. Sebebi, statıstıkaǵa súıensek, papılloma vırýsyn juqtyrýdyń joǵarǵy shegi kóbine 16-20 jas aralyǵyndaǵy názik jandylarǵa tıesili. Mamandardyń pikirinshe, ekpe erte jasta jasalsa, isiktiń aldyn alý múmkindigi artady.
«Jastardyń jynystyq qatynasqa erte túsýine baılanysty ekpe egý 11-12 jastaǵy qyzdardan bastalyp otyr. Biraq, vaktsınalaý jasatqannan soń da tekserýden ótýi shart. Sebebi, vaktsına densaýlyqty 100 paıyz qorǵamaıdy», - deıdi oblystyq onkologııalyq dıspanseri gınekologııa bóliminiń meńgerýshisi Baǵdat Ormanov.
Aıta keteıik, elimizde jylyna 30 myńǵa jýyq naýqas qaterli isikke shaldyqsa, onyń 17 myńnan astamy baqılyq bolyp jatady. Osy máselege alańdaýshylyq bildirgen dárigerler aldaǵy demalys kúnderi oblys turǵyndary úshin arnaıy ashyq esik kúnin ótkizýdi josparlaýda.
Aınur Aqbaeva
