Ońtústik Qazaqstanda kún elektr stantsııasy salynbaq
ASTANA. QazAqparat - Sheteldik ınvestorlar Ońtústik Qazaqstanda kún elektr stantsııasyn salyp, elektropanelder shyǵarýdy qolǵa almaq, dep habarlaıdy OQO ákiminiń baspasóz qyzmeti.
Ońtústik Qazaqstan oblysynda qytaılyq kásipkerler qýattylyǵy 100 mvt bolatyn kún elektr stansasyn salmaq. Bul týraly Ońtústik Qazaqstan oblysynyń ákimi Janseıit Túımebaevpen kezdesýinde «Djan Sý Nıý Enerdjı Tehnolodjı» kompanııasynyń ókili Ge Djenson málim etti.
Basqosýda taraptar oblystaǵy qýattylyǵy 100 MVt bolatyn kún elektr stansasyn salý máselesin talqylady. Josparǵa sáıkes, kún elektr stansasy Otyrar aýdanynyń aýmaǵynda salynbaq. Bir jyldyń 300 kúni sáýleli bolatyn Ońtústik Qazaqstan oblysyndaǵy tabıǵı klımattyq jaǵdaıdy eskerip otyrǵan kásipkerler atalǵan jobaǵa 200 mln AQSh dollaryn jumsaýǵa nıetti.
«Biz aldaǵy qazan aıynda qurylys jumystaryn bastaýdy josparlap otyrmyz. Stantsııany iske qosyp bolǵannan soń, elektromobılderdi qurastyrý jumystaryn bastaıtyn bolamyz. Toqpen júretin mototsıklderdiń qural-jabdyqtaryn ázirge Qytaıdan tasymaldap, osynda qurastyrý josparda bar. Eger josparymyz sátti iske asyp jatsa, jeńil kólik pen qoǵamdyq kólikterdi de osynda qurastyrý oıymyzda bar», - dedi Ge Djenson myrza.
Bir qýanarlyǵy, kún elektr stansasy jobasyn júzege asyrýǵa jergilikti jas mamandar tartylmaq. Qytaı kásipkerleriniń aıtýynsha, kún elektr stansasynyń qurylysyna qatysatyn jas energetıkter bolashaqta ony qosýda qınalmaıtyn bolady.
Investorlardyń bul usynysyna qoldaý bildirgen óńir basshysy jergilikti bılik tarapynan jer telimi bólinip, qosymsha jeńildikter qarastyrylatynyn jetkizdi.
«Jobalaryńyz kóńilge qonymdy. Óıtkeni, bizdiń óńirdiń tabıǵaty kún sáýlesinen elektr jaryǵyn óndirýge óte qolaıly. Sondyqtan eki tarapqa da tıimdi jobany tezdetip iske asyrý qajet. Qajetti jer telimin bólip berip, qajetti qoldaýlardy kórsetýge ázirmiz», - dedi Janseıit Qanseıituly.
Qytaılyq kásipkerler munan bólek, elektropanelder shyǵarý isine de múddeli bolyp otyr. Bul rette olar elimizdiń «Jasyl ekonomıkalyq» ustanymyna qoldaý bildirmek.
