Ońtústik Qazaqstanda konstrýktsııaly medpýnktterdiń sany artýda
ShYMKENT. QazAqparat - Ońtústik Qazaqstan oblysynda aǵymdaǵy jyly modýldik quramaly 20 medıtsınalyq beketter paıdalanýǵa tapsyryldy. Aımaq basshysy Janseıit Túımebaevtyń tapsyrmasyna oraı salynǵan nysandar óńirdiń biraqatar qala-aýdandarynan ashyldy, dep habarlaıdy QazAqparat tilshisi.
Atap aıtqanda, Báıdibek aýdanynda - 3, Saıram men Túlkibas aýdanyndarynda - 2 jáne Saryaǵash óńirinde 13 medıtsınalyq beket boı kóterdi. Búginde atalǵan pýnktter halyqqa óz qyzmetin kórsetip keledi. Búgin oblystyq densaýlyq basqarmasynyń uıymdastyrýymen jýrnalıster Saryaǵash aýdanyndaǵy jańa modýldi quramaly medıtsınalyq beketterdiń jumysymen tanysyp qaıtty. Ondaǵy kórsetilip jatqan qyzmetterdi kózben kórip, jergilikti jurttyń pikirine qanyqty.
Máselen, Qoshqar ata aýyldyq okrýgine qarasty Qarabýra, Jambyl jáne Kalının eldi mekenderinen ashylǵan nysandar túrik kompanııalarynyń jobasy boıynsha boı kótergen. Olar zamanaýı medıtsınalyq jabdyqtarmen tolyq qamtylǵan. Feldsher men medbıke qyzmet kórsetedi. Alǵashqy medıtsınalyq kómek kórsetýge arnalǵan jańa medpýnktte balalar men eresekterge arnalǵan bólmeler de bar. Sondaı-aq, ekpe salynyp, medıtsınalyq saraptama qabyldaý jáne em-dom jasaýǵa barlyq jaǵdaı jasalǵan.
Mamandardyń málimetinshe, zamanaýı pýnktterdiń alańy 125 sharshy metrdi quraıdy. Modýldik konstrýktsııa quny 30 mln teńgeni quraıdy. Jańadan paıdalanýǵa berilgen modýldi quramaly medıtsınalyq beketter oblys turǵyndarynyń kóńilinen shyǵýda. Ásirese, shalǵaı eldi mekenderge mundaı medıtsınalyq beketterdiń salynýy bıýdjet qarajatynyń tıimdi jumsalýyna oń áser etýde.
Eske salaıyq, oblys boıynsha búginde 846 medıtsınalyq nysan bar. 225-i medıtsınalyq pýnkt bolsa, onyń 87-i jalǵa alynǵan. Aǵymdaǵy jyly taǵy 67 bekettiń qurylysy júrgiziletin bolady. Eger atalǵan joba iske assa, oblystaǵy medıtsınalyq beketterdiń qajettiligi tolyq qamtamasyz etilmek. Budan bólek, oblystaǵy densaýlyq saqtaý salasynda 9 nysannyń qurylysyna 4,6 mlrd teńge bólindi. Onyń ekeýi dárigerlik ambýlatorııa, jeteýi emhana bolady.
