Ońtústik Qazaqstanda qar qursaýynan bir túnde 83 adam qutqaryldy

Onyń ishinde úsheýi - balalar. Qutqarýshylar sondaı-aq jolda turyp qalǵan 29 kólikti shyǵaryp aldy, -dep habarlaıdy QazAqparat HAA tilshisi.

Tótenshe jaǵdaılar departamentiniń apattyq-qutqarý jumystary  Odamanbulaq asýynda «Ulanbel-Sozaq-Ekpindi» oblystyq mańyzy bar avtojolynda (577-623 km) júrgizildi.  Aýa raıynyń qolaısyzdyǵy jóninde eskertilgenimen, kólik júrgizýshileri qulaq aspaǵan. Saldarynan qar qalyń jaýǵan aýmaqta kólikter turalap qalǵan.  «Ońtústik joldary» jol tazalaýshy mekemesiniń 11 tehnıkasy men 20 mamany joldardy tazartý jáne qum sebý jumystaryn atqardy. 
 

«Qutqarýshylar jolda qalǵan jolaýshylardy  Odamanbulaq asýyndaǵy jylytý beketine jetkizdi.  Joldar qardan tazartylǵannan keıin  jolaýshylar Shaıan aýylyna qaıtaryldy. Al, qozǵalysqa jaramsyz 6 tehnıka jylytý beketinde qaldy», - dedi OQO TJD bas mamany Zarıpa Turysbekova.

Sondaı-aq Zarıpa Turysbekovanyń aıtýynsha, qutqarýshylar búgin túngi saǵat 02.20-da Báıdibek aýdany, Maıbulaq aýylynan aýdandyq aýrýhanaǵa «soqyrishek» dıagnozymen er azamatty jáne júkti áıeldi jetkizdi.  Sebebi, jedel-járdem kóligi qar qalyń jaýǵan aýmaqtan júrip óte almaǵan.
 

Aıta keteıik, Báıdibek aýdanynan 9-15 aqpan aralyǵynda qar qursaýynan jalpy 120 adam qutqarylyp, 41 tehnıka shyǵaryldy.