Ońtústik Qazaqstanda ınspektor balyqshylarǵa oq atyp, izin sýytqan
ShYMKENT. QazAqparat - Ońtústik Qazaqstan oblysynda balyq ınspektory Syrdarııa ózeninde balyq aýlap júrgen aǵaıyndylarǵa oq atyp, oqıǵa ornynan izin sýytqan, dep habarlaıdy «QazAqparat» HAA tilshisi.
Oblystyq ishki ister departamenti baspasóz qyzmetiniń jetekshisi Saltanat Qarakózovanyń aıtýynsha, oqıǵa Arys aýdanyna qarasty Qojatoǵaı eldi mekeniniń mańynda bolǵan. Balyq aýlap júrgen 19 jáne 20 jastaǵy aǵaıyndylarǵa qaıyqpen belgisiz er adamdar taıanǵan. Ózderin ınspektsııa qyzmetkerleri retinde tanystyrǵandar aldymen qaıyqqa, keıinnen balyqshylarǵa qaraı oq atqan. Keıin oqıǵa ornynan izderin sýytqan. Al oq tıip jaralanǵan baýyrlar toǵaıǵa jasyrynǵan. Sol jerden ákelerine habarlasyp, kómek suraǵan. Oqıǵa ornyna shuǵyl jetken aǵaıyndylardyń týystary, olardy Arys aýdandyq aýrýhanasyna jetkizdi. Qos jigitke der kezinde medıtsınalyq kómek kórsetildi, qazir ómirlerine qaýip tónip turǵan joq.
Al aǵaıyndylarǵa oq jaýdyryp, oqıǵa ornynan qashqandardyń biri Ońtústik óńirlik memlekettik ınspektsııasynyń 30 jastaǵy qyzmetkeri ekeni anyqtaldy.
«Ol qashyp ketkenimen, eki táýlikten keıin polıtsııa bólimine ózi keldi. Qazir onyń ústinen Qylmystyq kodekstiń 293-baby 3-bóligi boıynsha («Buzaqylyq») is qozǵalyp, tergeý amaldary júrgizilýde. Sondaı-aq kúdiktige qatysty bultartpaý sharasyn qoldaný arqyly qamaýǵa alý máselesi qaralatyn bolady. Al oqıǵa bolǵan jerde balyq aýlaýǵa ruqsat bolǵan ba, joq pa, ol jaǵy tergeý barysynda anyqtalady», - dedi Saltanat Qarakózova.
