Ońtústik Qazaqstanda HQO arqyly 10 mln astam qyzmet kórsetilgen

  ShYMKENT. QazAqparat  - Ońtústik Qazaqstan oblystyq Halyqqa qyzmet kórsetý ortalyqtary 2 jyl ishinde 10 mıllıonnan astam qyzmet kórsetken. Oblystyq «Halyqqa qyzmet kórsetý ortalyǵy» departamentiniń dırektory Erkebulan Álseıitovtyń aıtýynsha,  qyzmetterdiń  7 mıllıony elektrondyq nusqada kórsetilgen, dep habarlaıdy  QazAqparat tilshisi.

Jyl basynan beri, azamattarǵa kórsetiletin memlekettik qyzmet túrleriniń sany 621-ge jetip otyr.

«Mamandandyrylǵan HQO arqyly eki jyl ishinde azamattarǵa avtokólikti qaıta tirkeý boıynsha 202 myńǵa jýyq qyzmet kórsetilip, 70 myńdaı júrgizýshi kýáligi berilgen. Al 2018 jyldyń basynan beri 62 myńnan astam avtokólikti qaıta tirkeý qujaty qabyldansa, 13 myńǵa jýyq júrgizýshi kýáligi tapsyrylyp otyr», - dedi Erkebulan Asanbaıuly.

Qazirgi tańda óńirde  34 Halyqqa qyzmet kórsetý ortalyǵy jumys isteıdi. Aǵymdaǵy jyldyń aqpan aıynda óńirde Tsıfrlyq HQO ashylyp, azamattarǵa  yńǵaıly bolý úshin ózine-ózi qyzmet kórsetý sektory qosyldy. Ortalyq mamandary azamattardyń úılerine bara otyryp 10 myńǵa jýyq qyzmet kórsetken.

  «Aıta keterligi, jýyq arada «Azamattarǵa arnalǵan Úkimet» Memlekettik korporatsııasyna» qarasty úsh birdeı departament birigetin bolady. Olar: OQO «Halyqqa qyzmet kórsetý ortalyǵy», Jer kadastry jáne jyljymaıtyn múlikti tehnıkalyq tekserý jáne Áleýmettik tólemder vedomstvo aralyq esepteý ortalyǵy departamentteri. Bul shara qurylymdyq bólimshelerdi ońtaılandyryp, túrli qyzmetterdi jeńildetýge baǵyttalǵan»,- dedi Erkebulan Asanbaıuly.