Ońtústik Qazaqstanda ekotýrızm qarqyndy damýda
ASTANA. QazAqparat - Ońtústik Qazaqstan oblysynda ekologııalyq týrızmniń áleýeti zor. Óńirdegi tarıhı oryndar, kórikti jerler men qaıtalanbas tabıǵı keshender otandyq jáne halyqaralyq ekotýrızmniń draıverine aınala alady. Búgin bul týraly OQO óńirlik kommýnıkatsııalar qyzmetinde ótken brıfıngte oblystyq Orman sharýashylyǵy jáne janýarlar dúnıesi aýmaqtyq ınspektsııasynyń bólim basshysy Qamytbek Jorabaev málim etti.
Onyń aıtýynsha, qazirgi tańda dúnıejúzilik mánge ıe bolyp otyrǵan bul sala tek kórkem tabıǵatymen ǵana shektelmeı, tarıh pen arheologııalyq qazbalardyń, mádenıet pen órkenıettiń, sáýlet pen eskertkishterdiń tartymdylyǵymen erekshelenip otyr.
«Aıta keterligi, ekotýrızm baǵytyn damytyp otyrǵan Aqsý-Jabaǵyly men Qarataý qoryqtary, Saıram-Ógem ulttyq parki jáne Syrdarııa-Túrkistan óńirlik tabıǵı parki sııaqty memlekettik mekemelerdiń úlesi mol. Odan bólek, oblys aýmaǵynda erekshe qorǵalatyn tabıǵı aýmaqtarǵa jatqyzylǵan 1 zoologııalyq jáne 1 dendrologııalyq park, 16 memlekettik tabıǵı eskertkish bar. Sondaı-aq, óńirde botanıkalyq áralýandylyqty saqtaý maqsatyndaǵy 7 tabıǵı qaýmal uıymdastyrylǵan. Olar: Aqdala, Temir, Boraldaı, Zadarııa, Jambyl qaýmaldary», - dedi Qamytbek Qasymbekuly.
Qýanarlyǵy, oblystaǵy erekshe qorǵalatyn tabıǵı aýmaqtarǵa kelýshilerdiń legi jyl sanap ósip keledi. Máselen, 2014 jyly 18623 adam bolsa, 2017 jyly 25687 adam demalýǵa kelgen. ıAǵnı demalýǵa kelgen týrıster sany úsh jyl ishinde 40 paıyzǵa artqan.
«Ońtústik halqynyń, onyń ishinde Shymkent qalasy turǵyndarynyń eń kóp demalýǵa baratyn oryndary bolyp Saıram-Ógem ulttyq parkiniń Qasqasý, Saıramsý, Birkólik, Ógem, Mashat, Kókbulaq shatqaldary sanalady. Búginde «Altyn Dán», «Ekspert-Servıs», «Qasqasý-Týr», «East West Company LTD» sııaqty demalys oryndary týrısterge qyzmet kórsetýde jemisti eńbek etip keledi», - dedi Qamytbek Jorabaev.
Oblystaǵy erekshe qorǵalatyn tabıǵı aýmaqtarda ósimdikterdiń 1800-den astam túri bar. Sondaı-aq, Qazaqstannyń Qyzyl kitabyna engen ósimdikterdiń 50-den astam túri ósse, sút qorekti janýarlardyń 41 túri, qustardyń 300-ge jýyq túri meken etedi.
