Ońtústik Qazaqstanda bıyl 3,2 myńǵa jýyq páter paıdalanýǵa beriledi
ShYMKENT. QazAqparat - Aǵymdaǵy jyly aýdany 252 myń sharshy metrli 3 197 páter paıdalanýǵa beriledi. Bul týraly búgin Elbasynyń júktegen fýnktsııalary men mindetteriniń oryndalýy boıynsha oblystyq máslıhat depýtattarynyń aldyndaǵy bergen esebinde Ońtústik Qazaqstan oblysynyń ákimi Beıbit Atamqulov málim etti.
Ákimniń málimetinshe, bıyl 5 mádenıet úıi, 1 murajaı paıdalanýǵa berildi.
«Jyl basynan oblys sportshylary chempıonattar men birinshilikterge qatysyp, 403 altyn, 392 kúmis, 384 qola medalǵa qol jetkizdi. Ózderińiz biletindeı, aǵymdaǵy jyly Rıo-de-Janeıro qalasynda ótken jazǵy Olımpıada oıyndarynda Qazaqstan qorjynyna 1 kúmis, 1 qola medaldy oblysymyzdyń sportshylary saldy. Esepti kezeńde 1 sport kesheni iske qosyldy», - dedi B. Atamqulov.
Halyqty qajetti ınfraqurlymmen qamtamasyz etý maqsatynda, aǵymdaǵy jyly 27 aýyzsý nysanynyń qurylysy júrgizilip, 25-i paıdalanýǵa beriletin bolady, 2 nysannyń qurylysy 2017 jylǵa aýysady. Onyń ishinde, sý qubyry múldem joq 7 eldi mekenge (5,6 myń halyq) jańa aýyz sý qubyrlarynyń qurylysy júrgizilip, 14 eldi mekendegi (59,5 myń halyq) tozyǵy jetken aýyz sý júıeleri jańartylady. Búginge 1 nysan iske qosyldy.
«Aǵymdaǵy jyly qurylysy júrgizilip jatqan 33 gaz nysandarynyń 12-si paıdalanýǵa berildi. Jyldyń qorytyndysymen 25 eldi meken gazdandyrylyp, nátıjesinde, tabıǵı gazben qamtylǵan eldi mekender sany jalpy 293 jetetin bolady, onda shamamen 1,7 mln. adam turady», - deıdi oblys basshysy.
Oblysta 199 jol nysannyń qurylys-jóndeý jumystary iske asyrylýda. Qazirgi tańda, 45 nysan paıdalanýǵa berildi. Jyldyń qorytyndysy boıynsha, 179 nysandy nemese 520 shaqyrym joldy paıdalanýǵa berýdi josparlanýda.
«2020 jylǵa deıingi óńirlerdi damytý» baǵdarlamasy aıasynda 790 myń sharshy metrli 262 úıdiń qurylysy júrgizilýde (11 135 páter). Aǵymdaǵy jyly 252 myń sharshy metrli 151 úı (3 197 páter) paıdalanýǵa beriledi», - dep atap ótti ákim.
